बुटवल, १९ चैत्र । प्रदेश ५ सरकारले प्रदेशको ३ स्थानमा स्थापना गर्न लागेको कोभिड १९ परिक्षण प्रयोगशालाका लागि संघिय सरकारले पठाएको पिसिआर मेसीन हाज बुटवल पुगेको छ । चैत्र १० गते प्रयोगशाला स्थापना गर्ने प्रदेश सरकारको निर्णय अनुसार पिसीआर सहित परिक्षणको लागि आवश्यक अन्य उपकरणहरु पनि आजै बुटवल पुगेको छ ।
रुपन्देहीको भैरहवा स्थित गहुंबाली अनुसन्धान केन्द्रमा प्रदेश स्तरिय प्रयोगशाला स्थापना भएपछि कोभिड १९ को स्वाव परिक्षण रिपोर्ट तत्काल आउने र संक्रमणको आशंकीतहरुले धेरै समय कुर्न नपर्ने प्रदेश सरकारले अपेक्षा गरेको छ । संघिय सरकारले पठाएको पोलिमेरेज चेन रिएक्सन पिसीआरको संचालनका लागि तिब्र गतिमा काम भईरहेको प्रदेश जन स्वास्थ्य प्रयोगशाला प्रमुख डाक्टर राजेन्द्र गिरीले जानकारी दिनुभयो । गिरीका अनुसार पिसिआरले प्रत्यक दिन १६ वटा स्वाव नमुना संकलनको जांच गर्नेछ । प्रयोशगशाला नभएकै कारण केन्द्रिय प्रयोगशालामा नमुना पठाउन ढिलो हुंदा बुटवलमा एकजनाको ज्यान समेत गएको छ ।
प्रदेश प्रयोगशाला प्रमुख गिरीले प्रयोगशाला स्थापनाको काम तिब्र गतिमा भईरहेकाले केहि दिनमा प्रयोगशाला संचालनमा आउने जानकारी दिनुभयो ।
मेसिन सहित प्राबिधीकहरुका लागि पर्सनल प्रोटेक्ट इकुमेण्ट, नमुना संकलनका लागि आवश्यक किट तथा नमुना ट्रान्सपोटेसनका लागि फ्रीज बक्सहरु समेत संघिय सरकारले बुटवल पठाएको छ । प्रदेश सरकारले रुपन्देही सहित दाङको बेलझुण्डी र नेपालगन्जको भेरी अस्पतालमा कोभिड १९ को परिक्षण प्रयोगशाला स्थापना गर्ने निर्णय गरेको थियो ।