काठमाडौं, २५ जेठ । विश्वभर महामारीको रुपमा फैलिएको कोरोना भाइरस पछिल्लो समय दक्षिण एसियामा फैलिदै गएको प्रति विश्व स्वास्थ्य संगठन (डब्लूएचओ )ले चासो ब्यक्त गरेको छ ।

पछिल्लो समय दैनिक रुपमा ठूलो संख्यामा कोरोना संक्रमित देखापरेपछि दक्षिण एसिया कोरोनाको हटस्टप बन्ने चिन्ता ब्यक्त गरेको हो ।

भारतमा हालसम्म २ लाख ४६ हजारभन्दा बढीमा कोरोना भाइरसको संक्रमण पुष्टि भएको छ। त्यहाँ मृतकको संख्या ६ हजार ९४६ पुगिसकेको छ।

भारतमा पछिल्लो समय दैनिक रुपमा ठूलो संख्यामा कोरोना संक्रमित थपिरहेका छन्। डब्लूएचओको ताजा जानकारीअनुसार दक्षिण एसिया हालसम्म कोरोनाको हटस्पट बनेको छैन। भारतमा हरेक तीनहप्तामा संक्रमितहरु दोब्बर बढिरहेको छ ।

भारतमा कोरोना भाइरसको संक्रमण अहिलेसम्मकै उच्च गतिमा पुगेको छ । आइतबार बिहान २४ घण्टाको अवधिमा भारतमा अहिलेसम्मकै सबैभन्दा बढी संक्रमित र मृतक थपिएका छन् । संक्रमितको संख्यामा भारत तेस्रो स्थानमा समेत पुगेको छ ।

भारतमा एकैदिन १० हजार ५२१ जना नयाँ संक्रमित थपिएका छन् । जबकि शनिबार ९ हजार ४७१ जना संक्रमित थपिएका थिए । त्यसअघि शुक्रबार ९ हजार ८३८ जना संक्रमित थपिएका थिए ।

त्यस्तै मृतक २४ घण्टामा २९७ जना थपिएका छन् । शनिबार २९६ जना थपिएका थिए । शुक्रबार २७४ थपिएका थिए । आइतबार अहिलेसम्मकै सबैभन्दा बढी मृतक थपिएका हुन् ।

अहिलेसम्म भारतमा संक्रमितको संख्या २ लाख ४६ हजार ६२२ पुगेको छ । मृतकको संख्या ६ हजार ९४६ पुगेको छ । संक्रमित बढिरहे पनि निको हुनेको संख्या समेत बढ्दै गएको छ । आइतबार ५ हजार ४९० जना डिस्चार्ज भएका छन् । जुन अहिलेसम्मकै उच्च हो । अहिलेसम्म १ लाख १८ हजार ६९५ जना डिस्चार्ज भएका छन् । संक्रमितको संख्या २४ घण्टामा बढ्दा भने विश्वमै भारत तेस्रो स्थानमा पुगेको छ ।

सबैभन्दा बढी ब्रजिलमा २७ हजार ५८१, दोस्रो स्थानको अमेरिकामा २२ हजार ७५३ जना संक्रमित हुँदा भारत तेस्रोमा रहेको हो । चौथो रुसमा ८ हजार ८५५जना संक्रमित भएका छन् । भारत कोरोनाबाट विश्वमा छैटौँ र दक्षिण एसियामा पहिलो धेरै प्रभावित देश हो ।

कुन ठाउँमा सबैभन्दा बढी प्रभावित

सबैभन्दा बढी प्रभावित महाराष्ट्रमा २४ घण्टामा २ हजार ७३९ जना संक्रमित बढ्दा ८२ हजार ९६८ पुगेका छन् । त्यस्तै मृतक १२० बढेर २ हजार ९६९ पुगेका छन् ।

तमिलनाडुमा १ हजार ४७६ जना बढेर ३० हजार १७२ जना संक्रमित हुँदा मृतक २५४, दिल्लीमा १ हजार ३२० जना बढेर २७ हजार ६५४ जना संक्रमित हुँदा मृतक ७६१, गुजरातमा ४९८ बढेर १९ हजार ६१७ जना संक्रमित हुँदा १ हजार २१९ को ज्यान गएको छ । भारतपछि कोरोनाले ग्रस्त बनेको मुलुक पाकिस्तान हो। त्यहाँ ९३ हजार ३८३ संक्रमित भएका छन् भने १ हजार ९ सय ३५ जनाको ज्यान गएको छ ।