वीरगंज ६ असार । पर्सा जिल्ला स्थित रहेको इलाका प्रहरी कार्यालय, पटेर्वासुगौलीमा निर्मित महिला प्रहरी भवनको उद्घाटन भएको छ। जिल्ला प्रहरी कार्यालय, पर्साकी प्रहरी उपरीक्षक गङ्गा पन्तले महिला प्रहरी भवनको शुक्रवार उद्घाटन गर्नुभएको हो । उद्घाटन समारोहमा उहाले महिला प्रहरीका लागि छुट्टै भवन निर्माण भएकोमा खुशी व्यक्त गर्नुभयो ।

उपरिक्षक पन्तले कोभिड–१९ महामारीमा प्रहरीले खेलेको भूमिका पर्याप्त नभएको भन्दै यो अभियानमा सबैको सहकार्य आवश्यक हुनेपर्ने बताउनुभयो । प्रहरी एक्लैले कोभिड–१९ रोकथाममा अहम् भूमिका खेल्न नसक्ने भन्दै उहाले समाजको सहकार्य आवश्यक भएको बताउनुभयो । प्रहरी उपरीक्षक पन्तले इप्रका, पटेर्वासुगौलीमा महिला प्रहरीको दरबन्दी नभए पनि महिला प्रहरी भवन निर्माण गरिएको कारण एक साताभित्र दुईजना महिला प्रहरी खटाउने प्रतिबद्धता जनाउनुभयो । उहाले जिल्लामै महिला प्रहरीको सङ्ख्या ७० मात्र रहेको बताउँदै सो अपुग भएको बताउनुभयो ।

महिला प्रहरीको अभावमा वीरगंज महानगरबाहेक पोखरिया नगरपालिकामा मात्र महिला प्रहरी रहेका छन् । गाउपालीकाका अध्यक्ष हरिनारायण चौधरीको अध्यक्षतामा भएको भवन उद्घाटन कार्यक्रममा उपाध्यक्ष ममता महतो, निमित्त प्रमुख प्रशासकीय अधिकृत भुजेन्द्रप्रसाद यादव, शिक्षक सुभाष दासलगायतले मन्तव्य व्यक्त गरेका थिए। इप्रका पटेर्वासुगौलीका प्रहरी निरीक्षक दीपक चोरवारले गापाको १५ लाखको लागतमा दुई कोठे सुविधासम्पन्न महिला प्रहरी भवन निर्माण भएको बताउनुभयो ।