काठमाडौं । नेपाली कांग्रेसका सभापति गगनकुमार थापाले केन्द्रीय कार्यसम्पादन समितिको बैठक बोलाएका छन्।

कांग्रेसको संस्थापनइतर पक्षले १५औँ महाधिवेशनको छुट्टै कार्यतालिका सार्वजनिक गरेपछि सभापति थापाले केन्द्रीय कार्यसम्पादन समितिको बैठक बोलाएका हुन्। बैठक भदौ २० गते शनिबार दिउँसो १ बजे पार्टीको केन्द्रीय कार्यालय सानेपामा बस्नेछ।

कांग्रेसका कार्यवाहक मुख्यसचिव कृष्णप्रसाद दुलालले बैठकका लागि दुईवटा मुख्य एजेन्डा तय गरिएको जानकारी दिएका छन्।

बैठकको पहिलो एजेन्डाका रूपमा रसुवाको भोटेकोसी बाढीबाट सिर्जित विपद्का विषयमा छलफल हुनेछ। बाढीबाट प्रभावित क्षेत्रमा उद्धार, राहत तथा पुनःस्थापनासम्बन्धी विषयमा बैठकमा छलफल हुने बताइएको छ।

दोस्रो एजेन्डा नेपाली कांग्रेसको १५औँ महाधिवेशन रहेको छ। महाधिवेशनको कार्यतालिका र पछिल्लो समय पार्टीभित्र देखिएको विवादका विषयमा बैठकमा छलफल हुने अपेक्षा गरिएको छ।

कांग्रेसले १५औँ महाधिवेशन आगामी असोज १६ देखि १९ गतेसम्म गर्ने गरी निर्वाचन कार्यतालिका अघि बढाएको छ। केन्द्रीय निर्वाचन समितिले प्रकाशित गरेको संशोधित कार्यतालिकाअनुसार भदौ २४ गते वडा अधिवेशनदेखि प्रक्रिया अघि बढ्नेछ।

पार्टीभित्र महाधिवेशनको मिति तथा कार्यतालिकालाई लिएर विभिन्न पक्षबीच मतभेद देखिएका बेला सभापति थापाले कार्यसम्पादन समितिको बैठक बोलाएका हुन्।

Originally published on abcnews.com.np.