काठमाडौं । परराष्ट्र मन्त्रालयले चीनको तिब्बतस्थित केरुङमा करिब १ हजार ५०० नेपाली नागरिक रहेको जनाएको छ।

बुधबार आयोजित पत्रकार सम्मेलनमा मन्त्रालयका प्रवक्ता लोकबहादुर पौडेल क्षेत्रीले केरुङमा रहेका नेपाली नागरिकलाई नेपाल फर्काउन चिनियाँ पक्षसँग समन्वय भइरहेको जानकारी दिए।

‘हाल करिब १५ सय जना नेपाली नागरिकहरू केरुङमा रहेका छन् र छिट्टै फर्कन चाहनेहरूका लागि हामी चिनियाँ पक्षसँग समन्वय गरिरहेका छौँ,’ उनले भने।

भदौ १० गते रसुवाको भोटेकोसी नदीमा आएको भीषण बाढीका कारण नेपाल–चीन सीमाक्षेत्रको आवागमन प्रभावित भएपछि ठूलो संख्यामा नेपाली नागरिक केरुङमा रोकिएका हुन्।

मन्त्रालयका अनुसार केरुङमा नेपालीका १७६ वटा ट्रक तथा कन्टेनरसमेत रोकिएका छन्। ती ट्रक तथा कन्टेनरलाई उपयुक्त सीमा नाकाबाट नेपालतर्फ ल्याउन चिनियाँ अधिकारीहरूसँग समन्वय भइरहेको प्रवक्ता क्षेत्रीले बताए।

‘केरुङमा रहेका १७६ वटा नेपाली ट्रक तथा कन्टेनरहरूको हकमा, तिनलाई उपयुक्त सीमा नाकाबाट डाइभर्ट गराउनका लागि हामी चिनियाँ अधिकारीहरूसँग समन्वय गरिरहेका छौँ,’ उनले भने।

प्रवक्ता क्षेत्रीले भदौ १० गते बाढी आएपछि चिनियाँ क्षेत्रतर्फ करिब १०० नेपाली नागरिक सम्पर्कविहीन भएको जानकारीसमेत दिए।

भोटेकोसी बाढीबाट रसुवा, नुवाकोट, धादिङलगायतका जिल्लामा ठूलो क्षति भएपछि सीमा क्षेत्रको आवागमन तथा उद्धार कार्यसमेत प्रभावित भएको छ। परराष्ट्र मन्त्रालयले प्रभावित नेपाली तथा विदेशी नागरिकको उद्धार, घरफिर्ती र आवश्यक समन्वयका लागि निरन्तर काम भइरहेको जनाएको छ।

Originally published on abcnews.com.np.