काठमाडौं, १ असोज । सत्तारूढ नेपाल कम्युनिष्ट पार्टी नेकपाका उपाध्यक्ष वामदेव गौतम राष्ट्रिय सभा सांसद बन्नुभएको छ । बिहीबार दिउँसो गौतमले राष्ट्रियसभा अध्यक्ष गणेशप्रसाद तिमिल्सिनाबाट सपथ लिनुभएको हो । सरकारको सिफारिसमा राष्ट्रपति विद्यादेवी भण्डारीले आजै गौतमलाई राष्ट्रिय सभा सदस्य नियुक्त गर्नुभएको थियो ।

सपथ ग्रहणपछि गौतमले राष्ट्रियता, जनताप्रति बफादार भएर भूमिका निभाउने बताउनुभएको छ । राष्ट्रियसभाको गरिमा र प्रतिष्ठा गिराउने छैन, गौतमले भन्नुभयो।

नेकपाका सचिवालय सदस्य समेत रहेका नेता गौतमले पार्टीको समाजवादमा जाने लक्ष्यमा पुग्न आफूले भूमिका खेल्ने पनि बताउनुभयो । सपथ ग्रहण कार्यक्रममा नेकपा नेता एवं पूर्वप्रधानमन्त्रीहरु पुष्पकमल दाहाल, झलनाथ खनाल, माधव नेपाल तथा नेकपा संसदीय दलका उपनेता सुवास नेम्वाङ लगायतको उपस्थिति थियो ।

२०७४ सालमा भएको चुनावमा बर्दिया १ बाट गौतम नेपाली कांग्रेसका सञ्जय गौतमसँग पराजित हुनुभएको थियो। गौतमलाई गत सोमबार बसेको मन्त्रिपरिषद बैठकले रिक्त एक राष्ट्रिय सभा सदस्यमा पठाउने निर्णय गरेको थियो।