काठमाडौं, १२ चैत । एक महिनादेखि ओछ्यानसहित बेपत्ता झा दम्पत्तीको शव बिहिबार फेला परेको छ। महोत्तरीको पिपरा गाउँपालिका–२ मा गाडिएको अवस्थामा उनीहरूको शव फेला परेको प्रहरीले जनाएको छ। प्रदेश नम्बर दुई प्रहरी कार्यालयका प्रमुख प्रहरी नायब महानिरीक्षक धिरज प्रताप सिंहका अनुसार फेला परेको शव हराइरहेका झा दम्पत्तिकै हो।

‘अस्ती हराएका बुढा–बुढीको शव आज पाँच फिट तल गाडिएको अवस्थामा फेला परेको हो, सिंहले भन्नुभयो उनीहरूले शव चाँडो कुहियोस् भनेर नुन पनि हालेको देखियो। मृतकका छोरा र भतिजाले सनाखत गरेको प्रहरीले जनाएको छ ।

उनीहरूको अपहरण र हत्याबारे अनुसन्धान भइरहेको सिंहले बताउनुभयो । गत फागुन १० गते महोत्तरीको पिपरा गाउँपालिकास्थित सहोडवाबाट ६५ वर्षीय मोसाफिर झा र उनकी पत्नी ६० वर्षीया गीतादेवी झालाई घरमै सुतिरहेको अवस्थामा ओछ्यानसहित वेपत्ता पारिएको थियो।

यसैवीच चैत्र ८ गते उनिहरुको हत्या गरेको आरोपमा चार जनालाई प्रहरीले सार्वजनिक थियो। घटनामा संलग्न रहेको आरोपमा पिपरा गाउँपालिका–५ सहोडवाका ५२ वर्षीय रामबाबु यादव, २६ वर्षीय सुरेन्द्र यादव, २४ वर्षीय राजेन्द्र यादव र भारतको मधुवनी घर भई पिपरन–६ बनौली बस्ने हरेन्द्र ठाकुरलाई पक्राउ गरिएको जिल्ला प्रहरी महोत्तरीले जनाएको थियो । पक्राउ परेकामध्ये हरेन्द्र ठाकुर जग्गाका कारोबारी हुन् ।

उनले सहोडवामा प्लटिङ गरेको १३ बिघा जग्गाको उत्तरतर्फ मुसाफिर झाको १४ कट्ठा जग्गा छ । आफ्नो प्लटिङमा बाटो बनाउन झालाई जग्गा बेच्न पटक–पटक जग्गा बेच्न दबाब दिँदै आएको खुलेको प्रहरीले जनाएको छ । झा जग्गा बेच्न तयार थिएनन् । ठाकुरले छिमेकी रामबाबु यादवमार्फत समेत झा दम्पतीलाई दबाब दिँदै आएका थिए । जग्गा कारोबारी ठाकुर फागुन १० गते प्लटिङ गरिएको जग्गामा उपस्थित भएको र दम्पती बेपत्ता भएको राति हरेन्द्र र रामबाबुबीच पटक–पटक अस्वाभाविक रूपमा संवाद भएको अनुसन्धानबाट खुलेको प्रहरीले जनाएको छ । महोत्तरी प्रहरी, प्रदेश २ प्रहरी कार्यालय जनकपुरसँगै केन्द्रीय अनुसन्धान ब्युरो ९सीआईबी० ले पनि अहिले घटनाको अनुसन्धान गरिरहेको छ ।