काठमाडौं, १० जेठ । विश्वभर महामारीको रुपमा फैलिएको कोरोना भाइरसबाट छिमेकी मुलुक भारतमा दैनिक भेटिने सङ्क्रमितको सङ्ख्यामा कमी हुँदै गइरहेको छ ।

दैनिक सङ्क्रमित सङ्ख्या कम हुँदै गइरहँदा मृत्यु दर भने बढ्दै गइरहेको छ । भारतमा यसअघि एक दिनमा चार लाख हाराहारीमा नयाँ बिरामी थपिने गरेका थिए । मृत्यु हुनेको सङ्ख्या चार हजार हाराहारीमा थियो ।

भारतमा पछिल्लो २४ घण्टामा दुई लाख २२ हजार आठ सय ३५ जनामा कोरोना यकिन भयो । यो सङ्ख्या अन्य मुलुकमा २४ घण्टाभित्र सङ्क्रमण पुष्टि भएको भन्दा अत्याधिक धेरै हो । तर एक दिनमा चार लाख हाराहारीमा नयाँ बिरामी थपिने भारतका लागि भने यो सङ्ख्या निक्कै कम हो ।

विश्वमा दैनिक सङ्क्रमण पुष्टि हुनेमध्ये आधाभन्दा बढी भारतीय नागरिक हुने गरेका छन् । भारतमा सङ्क्रमित सङ्ख्या दुई करोड ६७ लाख ५१ हजार छ सय ८१ पुगेको छ । सङ्क्रमितमध्ये दुई करोड ३७ लाख २० हजार नौ सय १९ जना उपचारपछि निको भएका छन् ।

२७ लाख २७ हजार ११ जनाको उपचाररत रहेकोमा आठ हजार नौ सय ४४ को अवस्था गम्भीर छ । कोरोनाका कारण विश्वमा प्रभावित हुनेमध्ये दोस्रो नम्बरमा रहेको मुलुक भारतमा एकै दिन चार हजार चार सय ५५ जनाको मृत्यु भयो । यो सङ्ख्या पनि अन्य मुलुकमा ज्यान गुमाएका सङ्क्रमितको भन्दा धेरै हो ।

भारतमा एकै दिन यतिधेरै सङ्क्रमितको मृत्यु भएको यो नै पहिलो हो । भारतमा अहिलेसम्म कोरोनाका कारण तीन लाख तीन हजार सात सय ५१ जनाको मृत्यु भइसकेको छ ।

भारतले कोरोनाविरुद्धको खोप आफै उत्पादन गरेर नागरिकलाई लगाउन थालेको छ । विश्वका विभिन्न मुलुकमा पनि खोप निर्यात गरिरहेको छ । तर खोप उत्पादन गरेर नागरिकलाई सुरक्षित बनाउनेतर्फ केन्द्रित रहेको भारतमा केही समययता सङ्क्रमण दर उच्च बनेको थियो ।