नुवाकोट । एमाले निकट विद्यार्थी संगठन अनेरास्ववियुले नुवाकोटका बाढीपीडितका लागि ७ लाख रुपैयाँ बराबरको खाद्य तथा स्वास्थ्य सामग्री सहयोग गरेको छ।

अनेरास्ववियुका अध्यक्ष दीपक धामीको नेतृत्वमा गएको ४० सदस्यीय टोलीले बाढीका कारण घरबारविहीन भएका पीडितलाई आवश्यक राहत सामग्री वितरण गरेको हो।

टोलीले आयुर्वेदिक अस्पताल, तल्लो पिपलटारस्थित होल्डिङ सेन्टरमा आश्रय लिइरहेका २०० जना बाढीपीडितलाई ३ लाख रुपैयाँ बराबरको खाद्य सामग्री वितरण गरेको छ।

यस्तै, श्री विदुर क्रियापुत्री भवनस्थित होल्डिङ सेन्टरमा रहेका १५० जना बाढीपीडितलाई ४ लाख रुपैयाँ बराबरको स्वास्थ्य सामग्री वितरण गरिएको अध्यक्ष धामीले जानकारी दिनुभयो।

बाढीका कारण घरबारविहीन भएका नागरिकलाई तत्काल आवश्यक पर्ने खाद्य तथा स्वास्थ्य सामग्री उपलब्ध गराउनु राहत कार्यक्रमको मुख्य उद्देश्य रहेको उहाँले बताउनुभयो।

थप सहयोगको तयारी

अध्यक्ष धामीले विपत्तिमा परेका नागरिकलाई सहयोग गर्नु अनेरास्ववियुको सामाजिक दायित्व भएको बताउनुभयो। बाढीपीडितको अवस्थाको थप मूल्यांकन गरी आवश्यकताअनुसार थप सहायता उपलब्ध गराउने विषयमा संगठनले छलफल गरिरहेको उहाँले जानकारी दिनुभयो।

Originally published on abcnews.com.np.