काठमाडौँ । नेपाल राष्ट्र बैंकले प्रधानमन्त्री दैवी प्रकोप उद्धार कोषमा स्वदेश तथा विदेशबाट विभिन्न माध्यममार्फत सहयोग रकम जम्मा गर्न सकिने व्यवस्था सार्वजनिक गरेको छ।

बाढीपहिरोलगायत प्राकृतिक विपद्बाट प्रभावित नागरिकको राहत तथा उद्धारमा सहयोग पु¥याउने उद्देश्यले बैंक तथा वित्तीय संस्थामार्फत सहज रूपमा रकम जम्मा गर्न सकिने व्यवस्था मिलाइएको राष्ट्र बैंकले जनाएको छ।

राष्ट्र बैंकको भुक्तानी प्रणाली विभागले जारी गरेको सूचनाअनुसार नेपालभित्रका व्यक्ति तथा संस्थाले नगद, चेक, मोबाइल तथा इन्टरनेट बैंकिङ, वालेट र क्यूआर स्क्यानमार्फत कोषमा सहयोग रकम जम्मा गर्न सक्नेछन्।

यस्तै, विदेशमा रहेका नेपाली, गैरआवासीय नेपाली तथा विदेशी नागरिक र संघसंस्थाले पनि तोकिएका बैंक खातामार्फत सहयोग रकम पठाउन सक्ने व्यवस्था गरिएको छ।

यी बैंक खातामा जम्मा गर्न सकिने

कोषमा सहयोग रकम जम्मा गर्न स्ट्यान्डर्ड चार्टर्ड बैंक नेपाल, राष्ट्रिय वाणिज्य बैंक, एभरेस्ट बैंक, नेपाल बैंक, ग्लोबल आइएमई बैंक, नबिल बैंक र कृषि विकास बैंकमा ‘PRIME MINISTER DISASTER RELIEF FUND’ नामका खाता उपलब्ध गराइएको छ।

यी बैंकका तोकिएका खातामा नगद, चेक वा विद्युतीय माध्यमबाट सहयोग रकम जम्मा गर्न सकिनेछ।

विदेशबाट सहयोग रकम पठाउन हिमालयन बैंकको हितीटार शाखामा रहेको कोषको खातामा SWIFT मार्फत रकम पठाउन सकिने व्यवस्था गरिएको छ।

रेमिट्यान्स कम्पनी र एपबाट पनि सहयोग

राष्ट्र बैंकका अनुसार जीएमई, रेमिटली, वर्ल्डरेमिट, ट्यापटपसेन्डलगायत नेपालमा रेमिट्यान्स पठाउन मिल्ने विभिन्न कम्पनी तथा तिनका एपमार्फत समेत तोकिएका बैंक खातामा सहयोग रकम पठाउन सकिनेछ।

यस्तै, विदेशमा जारी भएका भुक्तानी कार्ड प्रयोग गरी राष्ट्र बैंकले उपलब्ध गराएको अनलाइन माध्यमबाट पनि कोषमा सहयोग रकम पठाउन सकिने व्यवस्था गरिएको छ।

विपद्को समयमा राहत तथा उद्धार कार्यमा सहयोग गर्न इच्छुक व्यक्ति, संस्था तथा विदेशमा रहेका नेपालीलाई आधिकारिक माध्यममार्फत प्रधानमन्त्री दैवी प्रकोप उद्धार कोषमा सहयोग रकम जम्मा गर्न राष्ट्र बैंकले आग्रह गरेको छ।

Originally published on abcnews.com.np.