पोखरा । रसुवामा आएको विनाशकारी बाढीपछि राहत, उद्धार तथा पुनःस्थापनाका लागि गण्डकी प्रदेश सरकारले चार करोड रुपैयाँ सहयोग गर्ने भएको छ । शुक्रबार बसेको प्रदेश सरकारको बैठकले प्रधानमन्त्री दैवी प्रकोप उद्धार तथा राहत कोषमा चार करोड रुपैयाँ जम्मा गर्ने निर्णय गरेको हो । मुख्यमन्त्री सुरेन्द्रराज पाण्डेले शुक्रबार अपिल जारी गर्दै बाढीका कारण ठूलो जनधनको क्षति भएकोप्रति दुःख व्यक्त गरेका छन् । उनले बाढीमा ज्यान गुमाउनेहरूप्रति श्रद्धाञ्जली अर्पण गर्दै शोकसन्तप्त परिवारजनमा समवेदना व्यक्त गरेका छन् । साथै, घाइते तथा प्रभावित नागरिकको शीघ्र स्वास्थ्यलाभको कामना गरेका छन् । सम्पर्कविहीन नागरिकको खोजी तथा उनीहरूको अवस्थाबारे जानकारी लिन र फेला परेका शवको उचित व्यवस्थापनका लागि सम्बन्धित निकायसँग समन्वय भइरहेको मुख्यमन्त्री पाण्डेले बताएका छन् । खोज तथा उद्धार कार्यलाई तीव्र बनाउन गण्डकी प्रदेश सरकारले आवश्यक समन्वय गरिरहेको उनको भनाइ छ ।

मुख्यमन्त्री पाण्डेले विपद् कुनै एक जिल्ला वा क्षेत्रको मात्र समस्या नभई सम्पूर्ण नेपालीको साझा पीडा र चुनौती भएको बताएका छन् । उनले संकटको घडीमा पीडितको साथमा उभिनु र प्रभावित परिवारलाई सहयोग गर्नु सबैको साझा मानवीय दायित्व भएको उल्लेख गरेका छन् ।

Originally published on abcnews.com.np.