कास्की । त्रिशूली तथा नारायणी नदी किनारमा भेटिएका १०२ शव पहिचान तथा परीक्षणका लागि पोखरा ल्याइएको छ।

भोटेकोसी नदीमा आएको बाढीले बगाएकाहरूको खोजीका क्रममा सुरक्षाकर्मी तथा स्थानीयवासीले धादिङ, गोरखा, तनहुँ र पूर्वी नवलपरासीलगायत जिल्लामा फेला पारेका शवको व्यवस्थापन तथा परीक्षण गर्ने व्यवस्था ती जिल्लामा नभएपछि पोखरा ल्याइएको कास्कीका सहायक प्रमुख जिल्ला अधिकारी चित्राङ्गद बरालले जानकारी दिनुभयो।

बिहीबार राति पूर्वी नवलपरासीबाट ४१, तनहुँबाट २३, गोरखाबाट ११ र धादिङबाट २७ शव पोखरा ल्याइएको हो। ती शवको व्यवस्थापन पश्चिमाञ्चल क्षेत्रीय अस्पतालमा गरिएको छ।

यस्तै, तनहुँका विभिन्न स्थानमा भेटिएका नौ शव पोखरा स्वास्थ्य विज्ञान प्रतिष्ठानमा परीक्षण गरेपछि मणिपाल शिक्षण अस्पताल पठाइएको छ।

पोखराका सरकारी तथा निजी अस्पतालमा गरी एकपटकमा ८८ शव मात्रै व्यवस्थापन गर्न सकिने क्षमता रहेको प्रशासनले जनाएको छ।

फेला परेका शवको परीक्षण तथा पहिचान प्रक्रिया अघि बढाएर आफन्तको खोजीका लागि सार्वजनिक सूचना जारी गर्ने तयारीमा स्थानीय प्रशासन रहेको छ।

Originally published on abcnews.com.np.