आज जारी गरेको शुभकामना सन्देशमा उनले वर्तमान सरकारले कानुनविपरीत काम गरिरहेको आरोप लगाएका छन्। ‘जनमतले अस्विकार गरिसकेको वर्तमान सरकार सत्ता लम्ब्याउने अनेक बहाना खोजिरहेको छ,’ ओलीले भनेका छन्, ‘आफ्नो स्वार्थ पूरा गर्नका लागि उसले संविधान र कानुनविपरीत अनेक काम गरिरहेको छ।’

कामचलाउ भइसकेको सरकारले अझै पनि कार्यकारी अधिकार प्रयोग गर्नु निन्दनीय भएको उनको भनाइ छ।

केही दिनमै देशले नयाँ सरकार पाउने भन्दै उनले संविधान, कानुन र जनविरोधी काम गर्ने समय अब धेरै बाँकी नरहेको उल्लेख गरेका छन्।

देशी विदेशीका राजनीतिक स्वार्थ पूरा गर्न नेपाललाई प्रयोगशाला बनाइएको उल्लेख गर्नसमेत उनले छुटाएका छैनन्। प्रदेश तथा प्रतिनिधिसभाको निर्वाचनपछि नेपालको राजनीतिक संक्रमणकाल सकिएको उल्लेख गर्दै उनले अबको प्राथमिकता विकास र समृद्धि भएको र वाम गठबन्धनले त्यसलाई पूरा गर्ने बताएका छन्।

शुभकामना सन्देशमा उनले एक जातिको चाडपर्वमा अर्को जातिले पनि रमाइलो गर्नु, ती चाडपर्व आफूले अंगीकार गर्नु नेपालीको मौलिक विशेषता भएको बताएका छन्।

‘नेपाल बहुजातीय, बहुभाषिक, बहुसांस्कृतिक, बहुधार्मिक देश हो. गुरुङ समुदायले तमु ल्होसारलाई नयाँ वर्ष आरम्भ दिनका रुपमा समेत मनाउने गरेका छन्। यस समुदायको मौलिक नयाँ वर्षका रुपमा समेत सम्पूर्ण गुरुङ समुदायको सु–स्वास्थ्य र उत्तरोत्तर प्रगतिको कामना गर्दछु,’ उनले जारी गरेको सन्देशमा लेखिएको छ।