काठमाडौं २५ पुस । नेकपा एमाले र माओवादी केन्द्रबीचको पार्टी एकताका लागि दुई वटा अलग अलग कार्यदल गठन गर्ने सहमति भएको छ । ओली निवास बालकोटमा जारी पार्टी एकता संयोजन समितिको बैठकले छिटै पार्टी एकतालाई निश्कर्षमा पुर्याउन एकीकृत दस्तावेज तयार गर्ने र संगठनात्मक समायोजनका लागि अगल अलग कार्यदल गठन गर्ने सहमति भएको स्रोतले बतायो । सगठनात्मक समायोजनका लागि एमालेबाट महासचिव इश्वर पोखरेल र माओवादीबाट रामबहादुर थापा बादल सहितको कार्यदल बन्नेछ । त्यसैगरी दस्तावेज तयारीका लागि ओली र प्रचण्डसहितको कार्यदल बनाउने तयारी भएपनि अर्को बैठकबाट मात्र निर्णय गर्ने आजको बैठकले निर्णय गरेको छ ।
एमाले र माओवादी केन्द्रको पार्टी एकता संयोजन समितिले राष्ट्रियसभा र प्रदेश सरकार गठनबारे गृहकार्य गर्न कार्यदल बनाएको छ ।

बैठकले प्रदेश सरकार, राष्ट्रियसभा गठनमा गृहकार्य गर्न ६ सदस्यीय कार्यदल बनाएको छ । कार्यदलमा एमालेबाट सुवास नेम्वाङ, शंकर पोखरेल र सुरेन्द्र पाण्डे र माओवादीबाट रामबहादुर थापा बादल, वर्षमान पुन र मातृका यादव छन् ।

एमाले र माओवादीको बैठकले निर्वाचित जनप्रतिनिधिलाई सत्ता हस्तान्तरणका लागि आवश्यक न्यूनतम संवैधानिक र कानुनी प्रक्रिया पुरा गर्ने र दैनिक कार्यसञ्चालन बाहेक अन्य निर्णय नगर्न सरकारलाई सचेत गराएको छ ।

यस अघि दुई अध्यक्षबीचको छलफलले नेकपा एमाले र नेकपा माओवादी केन्द्रको शिर्ष तहको पद बाँडफाँडमा सैद्धान्तिक सहमति भएको थियो । संयोजन समितिको बैठक लगत्तै दुई अध्यक्षक बीचमा केही बेर वानटु वान छलफल भएको थियो ।