काठमाडौँ, २८ बैशाख । स्थानीय चुनाव आउन २ दिन बाँकी रहँदा काम विशेषले काठमाडौं बसेका नागरिक मत दिन गाउँ फर्किने क्रम बढेको छ । दैनिक २० हजारका दरले उपत्यका छोडेको अनौपचारिक तथ्याङ्क छ भने चुनावकै लागि १२ लाखले उपत्यका छोड्ने अनुमान गरिएको छ ।

गोंगबुस्थित राजधानीको नयाँ बसपार्कमा सांस्कृतिक पर्व दशैंमा नदेखिएको उत्साह चुनावी पर्वमा देखिएको छ । विभिन्न राजनीतिक पार्टीले स्थानीय चुनावका लागि गृहजिल्ला जान चाहनेका लागि निःशुल्क बससुविधा दिएपछि बसपार्कमा मतदाताको ओइरो लागेको छ । दर्जनौं गाडी र बाक्लो भीडमा आफू जाने गाडीको भेउ नपाउँदा धेरै यात्रु अलमलिएका देखिन्थे । सम्बन्धित जिल्लाबाटै गाडीको बुकिङ भएकाले मेचीदेखि महाकालीसम्मका नागरिक बसपार्कमा भेटिए ।

मतमार्फत आफ्नो मन अरुलाई दिने जिम्मेवारी पूरा गर्न गाउँ जान पाएकोमा उनीहरू दङ्गदास छन् । एउटै भोटले हारजितको निर्क्योल गर्ने भएकाले पनि मताधिकार प्रयोग गर्नुपर्ने उनीहरू बताउँछन् । त्यसो त, निःशुल्क सेवा मिलाएका सरोकारवालाहरू भने खर्च गरेर मतदाता ओसारेको स्वीकार्दैनन् । आफूहरूले कर नगरेको र जान चाहनेहरूका लागि भने निःशुल्क गाडीको व्यवस्था मिलाएको उनीहरू बताउँछन् । त्यसो त कुनै दल वा उम्मेदवारको निगाहविना आफ्नै खर्च मताधिकार प्रयोग गर्न गृहजिल्ला जानेहरूको लर्को पनि उत्तिक्कै छ । ८० वर्ष छुन लागेकी नुवाकोटकी ठूलीमाया भोट हाल्नकै लागि एक्लो यात्रा गर्दैछिन् । चुनाव दशैंजस्तो रमाइलो लाग्ने उनको भनाइ छ ।

मतदानकै लागि थातथलो जान लागेकाहरू नागरिक अधिकार गुमाउन नहुने पक्षमा छन् । अहिलेको भन्दा आगामी दिन सुधारका लागि पनि मतदान गर्नुपर्ने उनीहरूको धारणा छ । पार्टी भन्दा पनि व्यक्ति छान्न आफूहरू जान लागेको उनीहरू बताउँछन् । यात्रुहरूको चाप बढ्दा बाहिरिने यात्रुको सामान लोड गर्ने मजदुरले पनि उतिक्कै काम पाएका छन् । उनीहरूलाई सामान मिलाउन भ्याइनभ्याइ छ । गाडीहरू सबै भरिभराउ भएको र २९ गतेको लागि अघिल्लो दिन विहानै बुकिङ भइसकेको उनीहरू बताउँछन् । पाँच वर्षपछि आफ्नो जनप्रतिनिधि चयनमा देखिएको मतदाताको उत्साहलाई लोकतन्त्र सबल बनाउने प्रमुख आधार मान्न सकिन्छ ।