काठमाडौं, ५ जेठ । नेपाली कांग्रेसका नेता डा. मिनेन्द्र रिजालले बढ्दो आर्थिक संकटका विषयमा संसदमा गम्भीर छलफल गर्न आग्रह गर्नुभएको छ ।

प्रतिनिधिसभामा बिहीबार आगामी बजेटका सिद्धान्त र प्राथमिकता सम्बन्धी विधेयक माथिको छलफलमा बोल्दै नेता रिजालले सरकार र प्रतिपक्ष नभनी सबै पक्ष अर्थतन्त्र संकटको विषयमा गम्भीर हुन आग्रह गर्नुभयो । खाद्यन्न, लत्ताकपडा लगायतका आयातमा भइरहेको ठूलो खर्चले शोधनान्तर घाटालाई बढाएको भन्दै उनले कृषि उपज, खाद्यान्न, लत्ताकपडा आयात रोक्नुपर्ने बेला भएको बताउनु भयो । ‘वार्षिक ३ खर्ब ३० अर्बको खाद्यन्न र कृषि आयात प्रतिस्थापन गर्न सोच्ने बेला आयो,’ रिजालले भने, ‘लत्ताकपडाको आयात ४० अर्बबाट बढेर १४५ अर्ब पुग्यो ।’
स्वास्थ्य तथा औषधि, इन्धन लगायतका वस्तुको आयात बढेको विषयमा गम्भीर भएर सोच्नुपर्ने रिजालले बताउनुभयो । रेमिट्यान्स र भन्सार करबाट प्राप्त हुने राजस्व चलाउने जमातको जन्म भएको भन्दै उनले राजश्वको दुरुपयोग रोक्न पनि आग्रह गर्नुभयो । ‘पहिले विदेशी सहायता चलाउने जमात थियो,’ नेता रिजालले भने, ‘अहिले रेमिट्यान्स र भन्सारबाट स्वतः प्राप्त हुने राजस्व जतासुकै चलाउन पाउने जमातको जन्म भएको छ ।’
उहाँले पुँजीगत खर्च कमजोर हुनुमा वर्तमान सरकार मात्रै दोषी नरहेको भन्दै त्यसको बचाउ गरे ।