नेकपा एमालेका अध्यक्ष केपी शर्मा ओलीले स्थानीय तह चुनावमा एमालेले चुनाव मात्र नलडेर एउटा महासंग्राम नै लड्नु परेको बताउनुभएकाे छ ।

एमालेबाट निर्वाचित जनप्रतिनिधिका लागि काठमाडौंमा भएको प्रशिक्षण कार्यक्रममा ओलीले महासंग्राम जितेर आएको भन्दै जनप्रतिनिधिलाई बधाई दिनुभयाे । उहाँले चुनावका नाममा गरिएका अस्वस्थ र अलोकतान्त्रिक गतिविधिसँग पनि लडेर आएका कारण एमालेका जनप्रतिनिधिले महासंग्राम लडेको बताउनुभयाे । ओलीले एमाले बाहेक अरुसँग विकासको कुनै योजना नरहेको आरोप लगाउनुभएकाे छ।

देशको विकास गर्ने र समृद्धि बनाउन पार्टी एमाले रहेको भन्दै उहाँले त्यो जिम्मेवारी पूरा गर्न जनप्रतिनिधिहरुलाई निर्देशन दिनुभयाे। विकासका कामहरुलाई अघि बढाउन भिजन र योजनासहित अघि बढ्न निर्देशन दिँदै उहाँले भन्नुभयाे, ‘विकासका लागि साझा प्रयास गर्नुहोस र विकासको अभियान्ता बन्नुहोस् ।’