काठमाडौं, ३ माघ । एफए कप फुटबल अन्तर्गत गएराति भएको तेस्रो चरणको रिप्ले खेलमा जित निकाल्दै प्रिमियर लिग क्लब लेस्टर सिटीले अघिल्लो चरणमा स्थान पक्का गरेको छ ।

घरेलु मैदानमा भएको खेलमा लेस्टर सिटीले फेल्टवुड टाउनलाई २–० ले हराएको हो । लेस्टरको जितमा दुवै गोल केलिची इहिनाचोले गरे । ४३ औं मिनेटमा इस्लामी स्लिमानीको पासमा इहिनाचोले गोल गर्दै लेस्टरलाई सुरुवाति अग्रता दिलाए । पहिलो हाफमा लेस्टरका लागि एक गोल गरेका इहिनाचोले दोस्रो हाफमा कीर्तिमानी र महत्वपूर्ण गोल गरे ।

खेलको ७७ औं मिनेटमा इहिनाचोले गोल गरे । रियाद महरेजले पास गरेको बललाई इहिनाचोले गोलमा परिणत गरेका हुन् । तर सुरुमा यसलाई अफसाइड रहेको भन्दै गोलको मान्यता दिइएको थिएन । तर रेफ्री जोनथन मोस लिइएसेडले भिडियो एसिस्टेन्ट रेफ्री (भिएआर) को प्रयोग गरे अनि त्यसमा अफसाइड नरहेको देखिएपछि गोलको मान्यता दिए ।

यसरी इंग्लिस फुटबलमा भिएआरमार्फत गोल गर्ने इहिनाचो पहिलो खेलाडी बनेका छन् । तेस्रो चरणको खेलमा गोलरहित बराबरी भएपछि दुई टिमबिच रिप्ले भएको हो ।

राति नै भएका अरु रिप्लेमा कार्डिफले म्यानस्फिल्डलाई ४–१, सेफिल वेइनस्डेले कारलिस्लेलाई २–०, वेष्ट ह्यामले श्रीस्बुरीलाई १–० तथा रिडिङले स्टेवेनागेलाई ३–० ले हराएर अघिल्लो चरणमा स्थान पक्का गरेका छन् ।