तुलसीपुर, ४ माघ । प्रदेश नम्बर ५ को अस्थायी राजधानी दाङलाई नतोकेको विरोधमा आज पनि दाङ जिल्ला बन्द गरिएको छ ।
बन्दका कारण आज पनि बिहानैदेखि जिल्लामा लामो तथा छोटो दूरीका कुनै पनि सवारीसाधन सञ्चालन भएका छैनन् भने बिहानैदेखि यहाँका शिक्षण संस्था, कलकारखाना बन्द रहेका छन् ।

त्यसैगरी जिल्लाका तुलसीपुर, नारायणपुर, घोराही, लमही, गढवा र भालुबाङ बजार पनि बिहानैदेखि बन्द रहेका छन् ।
पूर्व–पश्चिम राजमार्गअन्तर्गत दाङ सडकखण्ड पूर्णरुपमा बन्द हुँदा भालुवाङ र अमेलियामा सवारीसाधन रोकिएका छन् । दाङलाई प्रदेशको राजधानी बनाउन सबै हिसाबले उपयुक्त भए पनि सरकार तथा राजनीतिक दलका नेताले दाङ माथि ठूलो अन्याय गरेकाले र आफूहरुले सरकारले तत्काल निर्णय नसच्याए अनिश्चितकालीन आमहडताल जारी राख्ने समितिका सदस्य–सचिव एवं नेपाल पत्रकार महासंघ दाङका अध्यक्ष सविन प्रियासनले जानकारी दिए ।

दाङ निर्वाचन क्षेत्र नं २ बाट प्रतिनिधिसभा सदस्यमा निर्वाचित नेकपा माओवादी केन्द्रका नेता कृष्णबहादुर महराले विज्ञप्ति निकालेर दाङलाई प्रदेश राजधानी नतोकेकोमा विरोध समेत जनाएका छन् ।

एमालेका नेता तथा दाङ क्षेत्र नं २ को १ बाट प्रदेशसभामा निर्वाचित शंकर पोख्रेलले सरकारको निर्णयलाई विवेकहीन भएको आरोप लगाएका छन् । यसअघि बुधबार अबेरसम्म घोराहीमा बसेको दाङ राजधानी सरोकार समितिले विभिन्न निर्णय गर्दै थप आन्दोलन चर्काउने जनाएको थियो ।
यसैबीच आज घोराहीमा सर्वपक्षीय बैठक बसिरहेको छ ।