काठमाडौं, २३ भदौं । सुदूरपश्चिम प्रदेशमा प्रधानमन्त्री एवम् नेपाली कांग्रेसका सभापति शेरबहादुर देउवादेखि विभिन्न प्रभावशाली नेताहरु निर्वाचनमा प्रतिस्प्रर्धा गदै छन् । उद्योग वाणिज्य तथा आपूर्ती मन्त्री दिलेन्द्र प्रसाद बडू, पूर्वमन्त्रीहरु बिना मगर, प्रेम बहादुर आले लगायतका नेताहरु यही प्रदेशबाट प्रतिनिधित्व गर्छन् । प्रमुख प्रतिपक्षी दल नेकपा एमालेका प्रभावशाली नेता डा. भीम रावलदेखि निरा देवी जैरु, कांग्रेसका युवा नेता प्रकाश रसाइली स्नेही लगायतका नेताहरुको चुनावी सक्रियता बढेको छ ।

प्रधानमन्त्री एवम् नेपाली कांग्रेसका सभापति शेरबहादुर देउवा डडेलधुराबाट संघीय निर्वाचनका लागि एकल उम्मेदवार हुन् । एक मात्र निर्वाचन क्षेत्र रहेको डडेलधुरामा देउवाले २०४८ सालदेखि लगातार चुनाव जित्दै आएका छन् । देउवा पत्नी डा. आरजु राणा संघीय निर्वाचनको समानुपातिक महिला सदस्यमा सिफारिस भएका छन् ।

राणा कैलाली क्षेत्र नम्बर ५ बाट सिफारिस भएकी हुन् । डडेलधुराबाट प्रतिनिधिसभामा हाल प्रधानमन्त्री देउवा र नेकपा एकीकृत समाजवादीका निरादेवी जैरु प्रत्यक्ष सांसद छन् । डडेलधुरामा सत्ता गठबन्धनबीच चुनावी तालमेल नगर्ने निर्णय भएको छ । प्रधानमन्त्री देउवाले अहिलेको पाँच दलीय सत्ता गठबन्धनको नेतृत्व गर्दै आएका छन् भने चुनाव र आगामी सरकार निर्माणसम्म गठबन्धनलाई सँगै लानुपर्ने रणनीतिमा छन् ।

प्रमुख प्रतिपक्षी दल नेकपा एमालेले निर्विवाद उम्मेदवार सिफारिस गर्दै आएको छ । सुदूरपश्चिम प्रदेश अन्तर्गत एमालेले कैलाली ४ मा लेखराज भट्ट, कैलाली ५ मा नारदमुनि राना, अछाम १ बाट डा. भीम रावल प्रतिनिधिसभा सदस्यतर्फ सिफारिस गरेको छ । एमाले केन्द्री कमिटी सचिव तथा सुदूरपश्चिम ईन्चार्ज भट्ट २०७४ मा वाम गठबन्धनबाट चुनाव जितेका थिए । उनी त्यतिबेला माओवादी केन्द्रमा थिए । यसैगरी, अछाम २ बाट यज्ञ बोगटी, बैतडीबाट दामोदर भण्डारी, दार्चुलाबटा गणेशसिंह ठगुन्ना, डडेलधुराबाट पठानसिंह बोहोरा उम्मेदवार सिफारिस भएका छन् ।

२०७४ मा कञ्चनपुर क्षेत्र नम्बर १ मा नेकपा माओवादी केन्द्रकी बिना मगरले चुनाव जितेकी थिईन । मगरको क्षेत्रमा कांग्रेसले यो पटक संविधानसभा सदस्य दिवानसिंह विष्टलाई प्रतिनिधिसभा सदस्य उम्मेदवार बनाएको छ । २०७० मा विष्टले मगरलाई हराएका थिए भने २०७४ मा मगरले विष्टलाई पराजित गरेका थिए । यो पटक गठबन्धनको भागमा यो क्षेत्र माओवादीलाई छोड्नुपर्नेछ । यद्दपि, सत्तारुढ दलहरुले सबै क्षेत्रमा उम्मेदवार सिफारिस गरेका छन् । कांग्रेसले बझाङमा प्रत्यक्षतर्फ प्रकाश राइली स्नेहीसहित ८ र समानुपातितर्फ ११ जनाको नाम सिफारिस गरेको छ ।

बैतडीमा एमालेले हालका सांसद दामोदर भण्डारीलाई आगामी निर्वाचनमा प्रत्यक्ष उम्मेदवारकोरुपमा सिफारिस गरेको छ । प्रधानमन्त्री देउवादेखि विभिन्न दलका प्रभावशाली नेताहरु सुदूरपश्चिम प्रदेश अन्तर्गत चुनाव लड्दैछन् । यसपटक सत्ता गठबन्धनविरुद्ध नेकपा एमालेबीच मुख्य प्रतिस्पर्धा हुँदा एमाले भने कमजोर हुने आंकलन गरिएको छ । यद्दपि, राजनीतिक दल एवम् नेताहरु आ–आफ्नै दाबीसहित निर्वाचनमा होमिएका छन् ।