काठमाडौं, २४ भदौ । एमालेले लोकतान्त्रिक समाजवादी पार्टी (लोसपा) सँग चुनावी गठबन्धनको प्रयास गरेको छ । एमाले अध्यक्ष केपी ओलीले लोसपा अध्यक्ष महन्थ ठाकुरसँग भेटेर चुनावी गठबन्धनको प्रस्ताव राखेका हुन् । ठाकुरले पार्टी नेताहरुलाई ओलीसँग सकारात्मक कुरा भएको बताए ।

ओलीसँगको सहकार्य आफूहरुका लागि परिस्थितिको बाध्यता भएको उनको भनाइ थियो ।तर, ठाकुरले ओलीसँग नागरिकता विधेयकप्रतिको अनुदार एमाले नीतिका कारण मधेसमा मिलेर जान अप्ठ्यारो हुन सक्ने भने बताए । एमालेले जन्मसिद्ध नेपाली नागरिकका सन्तानलाई नागरिकता दिने गरी संसदले पारित गरेको विधेयकको विरोध गर्दै आएको छ । विधेयक दोश्रोपटक प्रमाणीकरणका लागि शीतलनिवास पुगेको छ । दोश्रोपटक प्रमाणीकरणमा गएको विधेयक पनि रोक्न एमालेले राष्ट्रपति प्रयोग गर्न सक्ने आशंका राजनीतिक वृत्तमा छ ।

राष्ट्रपतिले विधेयक रोक्न सक्ने आशंकाबीच माओवादी अध्यक्ष प्रचण्डले बिहीबार उनको राजीनामा मागेका थिए । सत्तारुढ गठबन्धनमा प्रतिनिधिसभामा जम्मा चार सिट माग्दा पनि नपाएपछि ठाकुर अन्ततः ओलीको शरणमा पुगेका हुन ।

ठाकुरले गठबन्धनमा सामेल गराउन प्रधानमन्त्री शेरबहादुर देउवालाई भेटेर पटकपटक आग्रह गरेका थिए । देउवा लोसपालाई गठबन्धमा सामेल गराउन सकारात्मक भए पनि गठबन्धनका बाँकी नेताहरु प्रचण्ड, माधव नेपाल र उपेन्द्र यादवले प्रतिगामीको मतियार भन्दै लोसपासँग सहकार्य गर्न नसकिने बताएपछि देउवा पछि हटेका थिए । लोसपा केपी ओलीले गरेको संसद विघटनको समर्थन गर्दै सरकारमा समेत सामेल भएको थियो । त्यतिबेला लोसपाmलाई फकाउन ओलीले नागरिकता विधेयकका प्रावधान समेटेर ओलीले अध्यादेश ल्याएका थिए ।