दाङ , १० माघ। नेकपा एमालेका उपमहासचिव विष्णु पौडेलले प्रदेश ५ को राजधानी कहाँ राख्ने भन्ने विषयमा प्रदेशसभाले विवेकसम्मत निर्णय गर्ने भएकोले अस्थायी मुकामबारे अनावश्यक विवाद गर्न नहुने बताएका छन् । राष्ट्रियसभाको उम्मेदवारी दर्ता गर्न एमालेको टोलीसँगै दाङको घोराही आएका पौडेलले उक्तकुरा बताएका हुन ।

‘अहिले भएको निर्णय अस्थायी हो, अब प्रदेशसभाको दुई तिहाई बहुमतले अन्तिम निर्णय गर्छ,’ उनले भने, ‘अस्थायी मुकाम तोकेको विषयमा अनावश्यक विरोध गर्दा प्रदेशसभाको इज्जत र मर्यादाका लागि पटकै सुहाउदैन ।’

भौगोलिक रुपमा दाङको पनि रुपन्देहीको पनि पक्षमा दुई तिहाई पुग्दैन कसरी निर्णय हुन्छ त ? भन्ने सञ्चारकर्मीहरुको जिज्ञासमा उनले भने– ‘तपाईलाई प्रदेश सांसदहरुले अग्रिम जानकारी दिइसक्नुभएको छ र रु प्रदेश सभाका सांसदरु जिम्मेवार हुनुहुन्छ, उहाँहरुले विवेकसम्मत निर्णय गर्नुहुन्छ ।’

राष्ट्रिय सभाका उम्मेदवारहरुलाई लिएर नेता पौडेल, प्रदेश ५ का एमाले संसदीय दलको नेता शंकर पोख्रेललगायतका नेताहरु निर्वाचन कार्यालय पुगेका थिए ।

रुपन्देहीबाट प्रतिनिधिसभामा निर्वाचित पौडेलले समेत अस्थायी मुकाम गृहजिल्लामा तोक्नका लागि दवाव दिएको आरोप लाग्ने गरेको छ ।