काठमाडौं । नेपाल विद्युत् प्राधिकरणको खुद नाफा पछिल्लो आर्थिक वर्षमा ३ अर्ब ८७ करोड रुपैयाँले घटेको छ। आर्थिक वर्ष २०८२/८३ मा प्राधिकरणको खुद नाफा ५ अर्ब ४ करोड रुपैयाँमा सीमित भएको हो।

आर्थिक वर्ष २०८१/८२ मा प्राधिकरणले ८ अर्ब ९१ करोड रुपैयाँ खुद नाफा कमाएको थियो। त्यसअघि आर्थिक वर्ष २०८०/८१ मा नाफा १३ अर्ब ३१ करोड रुपैयाँ थियो।

प्राधिकरणका अनुसार विदेशी विनिमय दरमा आएको वृद्धिका कारण दायित्व बढ्नुका साथै ब्याज र ह्रासकट्टी खर्च बढ्दा नाफा घटेको हो। विदेशी विनिमयसम्बन्धी दायित्व २७२.८६ प्रतिशतले बढेर ११ अर्ब ५१ करोड रुपैयाँ पुगेको छ।

विद्युत् बिक्रीबाट बढ्यो आम्दानी

आर्थिक वर्ष २०८२/८३ मा प्राधिकरणले विद्युत् बिक्री तथा अन्य आम्दानीबाट कुल १ खर्ब ६६ अर्ब रुपैयाँ आम्दानी गरेको छ। विद्युत् बिक्रीबाट मात्रै १ खर्ब ४८ अर्ब ६२ करोड रुपैयाँ आम्दानी भएको छ, जुन अघिल्लो वर्षको तुलनामा १८.२० प्रतिशत बढी हो।

विद्युत् चुहावट नियन्त्रण, कार्यसम्पादन सुधार र विद्युत् निर्यातमा भएको वृद्धिका कारण कुल नाफा १३.१७ प्रतिशतले बढेर ३१ अर्ब २३ करोड रुपैयाँ पुगेको प्राधिकरणले जनाएको छ। सञ्चालन मुनाफा पनि ७.२८ प्रतिशतले बढेर २४ अर्ब ८१ करोड रुपैयाँ पुगेको छ।

प्राधिकरणको कुल सम्पत्ति ८.९ प्रतिशतले बढेर ७ खर्ब ७९ अर्ब १९ करोड २० लाख रुपैयाँ पुगेको छ। निर्माणाधीन पुँजीगत आयोजनामा २ खर्ब ६ अर्ब २६ करोड ७० लाख रुपैयाँ लगानी भएको छ।

२५ लाखभन्दा बढी ग्राहकलाई निःशुल्क विद्युत्

प्राधिकरणले ५ एम्पियरका २५ लाख ८८ हजार ६२४ घरेलु ग्राहकलाई २१ करोड ७३ लाख ३२ हजार १६६ युनिट विद्युत् निःशुल्क वितरण गरेको जनाएको छ।

प्राधिकरणको औसत विद्युत् बिक्री दर प्रतियुनिट ९ रुपैयाँ ६८ पैसा रहेको छ। प्रतिग्राहक औसत खपत बढेर २ हजार ८८ युनिट पुगेको छ।

अनलाइन माध्यमबाट मात्रै ४० अर्ब ९९ करोड रुपैयाँ महसुल संकलन भएको प्राधिकरणले जनाएको छ।

घिसिङले भने– नाफा घट्नुमा गम्भीर समीक्षा आवश्यक

पूर्वऊर्जामन्त्री कुलमान घिसिङले प्राधिकरणको नाफा घटिरहेको विषयमा गम्भीर समीक्षा र सुधार आवश्यक रहेको बताएका छन्।

सामाजिक सञ्जालमार्फत उनले प्राधिकरणको नाफा संकुचन हुँदै गएको भन्दै यसको विकल्प प्राधिकरणलाई कमजोर बनाउनु नभएको बताएका छन्। प्राधिकरणलाई अझ सक्षम, सबल, व्यावसायिक, पारदर्शी र जनउत्तरदायी बनाउनुपर्ने उनको भनाइ छ।

प्राधिकरणको ४१औँ वार्षिकोत्सवका अवसरमा शुभकामना दिँदै घिसिङले लोडसेडिङको अन्त्यदेखि झन्डै शतप्रतिशत विद्युतीकरण र विद्युत्को खुद आयातकर्ताबाट खुद निर्यातकर्ता बन्नेसम्मको प्राधिकरणको यात्रालाई परिवर्तनको प्रेरणादायी उदाहरणका रूपमा प्रस्तुत गरेका छन्।

उनले सक्षम नेतृत्व, इमानदार व्यवस्थापन र स्पष्ट उद्देश्य पाए सार्वजनिक संस्थान राष्ट्रिय समृद्धिका बलिया संवाहक बन्न सक्ने उल्लेख गर्दै विश्वसनीय विद्युत् सेवा, ऊर्जा आत्मनिर्भरता र विद्युत् निर्यात विस्तारमा प्राधिकरणको भूमिका अझ प्रभावकारी बन्नुपर्ने बताएका छन्।

Originally published on abcnews.com.np.