कैलाली । ट्रकको ठक्करबाट नेकपा (एमाले) सुदूरपश्चिम प्रदेश कमिटी सल्लाहकार समिति सदस्य सावित्रा सापकोटाको मृत्यु भएको छ।

बर्दगोरिया गाउँपालिका–१ स्थित मुडा पुलनजिकै आज बिहान भएको दुर्घटनामा सापकोटाको मृत्यु भएको हो।

प्रहरीका अनुसार सापकोटा सवार से १–०१–००१ ख नम्बरको स्कुटरलाई नवलपरासी बर्दघाटका २६ वर्षीय दिनेश गिरीले चलाएको लु १–०१–०१० प ००४५ नम्बरको ट्रकले ठक्कर दिएको थियो।

ट्रकको ठक्करबाट गम्भीर घाइते भएकी सापकोटालाई तत्काल उपचारका लागि दोदोधरा अस्पताल लगिएको थियो। अस्पताल पुर्‍याएपछि चिकित्सकले उनलाई मृत घोषणा गरेका थिए।

चालक प्रहरी नियन्त्रणमा

दुर्घटनापछि ट्रक चालक गिरीलाई प्रहरीले नियन्त्रणमा लिएको छ।

इलाका प्रहरी कार्यालय बौनियाका प्रहरी निरीक्षक डम्बर विष्टका अनुसार गिरीलाई महेन्द्र राजमार्गअन्तर्गत बर्दगोरिया गाउँपालिका र लम्कीचुहा नगरपालिकाको सीमा क्षेत्रबाट नियन्त्रणमा लिइएको हो।

प्रहरीले दुर्घटनाको थप अनुसन्धान अघि बढाएको जनाएको छ।

२०७४ मा उपाध्यक्ष पदकी उम्मेदवार

सापकोटा एमालेमा सक्रिय नेतृका रूपमा कार्यरत थिइन्। उनी २०७४ सालको स्थानीय तह निर्वाचनमा बर्दगोरिया गाउँपालिकाको उपाध्यक्ष पदमा एमालेबाट उम्मेदवार बनेकी थिइन्।

पछिल्लो समय उनी एमाले सुदूरपश्चिम प्रदेश कमिटीअन्तर्गत सल्लाहकार समितिमा रहेर पार्टीको गतिविधिमा सक्रिय थिइन्।

सापकोटाको दुर्घटनामा मृत्यु भएपछि एमालेका स्थानीय तथा प्रदेशस्तरका नेता–कार्यकर्ताले दुःख व्यक्त गरेका छन्।

Originally published on abcnews.com.np.