धनगढी । सुदूरपश्चिम भ्रमणमा रहेका पूर्वाधार विकास मन्त्री सुनिल लम्साल बिरामी परेपछि थप उपचारका लागि काठमाडौं लगिएको छ।

नेपाल सरकारबाट निर्माणाधीन आयोजनाको अनुगमनका लागि बैतडी पुगेका मन्त्री लम्साल त्यहीँ रहँदा अचानक बिरामी परेका हुन्। स्वास्थ्यमा समस्या देखिएपछि उनलाई उपचारका लागि आज दिउँसो नेपाली सेनाको हेलिकप्टरमार्फत बैतडीबाट धनगढी ल्याइएको थियो।

धनगढीमा आवश्यक उपचारपछि थप स्वास्थ्य परीक्षण तथा उपचारका लागि नेपाली सेनाको ‘स्काई ट्रक’ मार्फत काठमाडौं लगिएको स्रोतले जनाएको छ।

बैतडीमै स्वास्थ्य समस्या

स्रोतका अनुसार मन्त्री लम्साललाई बैतडीमा रहँदा अचानक स्वास्थ्य समस्या देखिएको थियो। त्यसपछि तत्काल उद्धार गरी धनगढी ल्याइएको हो।

धनगढीमा प्रारम्भिक उपचारपछि थप उपचारका लागि काठमाडौं पठाइएको भए पनि उनको स्वास्थ्य समस्याको प्रकृति र हालको अवस्थाबारे विस्तृत विवरण सार्वजनिक गरिएको छैन।

Originally published on abcnews.com.np.