काठमाडौं। भृकुटीमण्डपमा साउन २६ देखि ३१ गतेसम्म सञ्चालन भएको नाइमा मोबिलिटी एक्स्पोमा १ लाख ८० हजार जनाले अवलोकन गरेका छन्। एक्स्पोमा करिब ५ हजार ५ सय चारपांग्रे र २ हजार दुईपांग्रे सवारीसाधन बुकिङ भएको आयोजकले जनाएको छ।

बुकिङ भएका सबै सवारी बिक्री भए करिब २० अर्ब रुपैयाँ बराबरको कारोबार हुने व्यवसायीहरूको अनुमान छ। उत्साहजनक बुकिङपछि केही व्यवसायीले केक काटेर र स्याम्पेन फोरेर खुसी मनाएका छन्।

एक्स्पोमा ५५ ब्रान्डका ४४ नयाँ मोडल सार्वजनिक गरिएको थियो। विद्युतीय सवारीसाधनमा दर्शकको विशेष आकर्षण देखिएको थियो। १८ लाखदेखि करिब ४ करोड रुपैयाँसम्मका सवारी एक्स्पोमा राखिएका थिए।

चारपांग्रेमा बीवाईडी, टाटा, चेरी, कियालगायतका ब्रान्डले उल्लेख्य बुकिङ पाएका छन्। बीवाईडीका एक हजारभन्दा बढी, टाटा र चेरीका ७ सयभन्दा बढी तथा कियाका ७ सयभन्दा बढी गाडी बुकिङ भएको जनाइएको छ। वुलिङका ४४३, आईकारका ४२१, ओमोडा जेकोका ३५०, एमजीका ३२९ र आर्कफक्सका २०० युनिट बुकिङ भएका छन्।

दुईपांग्रेमा एथर, याडिया, रोयल इनफिल्ड, सीएक्स मोटो र ट्रायम्फले राम्रो बुकिङ पाएका छन्। एथरका ४००, याडियाका १४५, रोयल इनफिल्डका १००, सीएक्स मोटोका २०० र ट्रायम्फका १०० युनिट बुकिङ भएका छन्।

नाइमा एक्स्पो संयोजक गौरव सारडाका अनुसार ३० देखि ३५ लाख रुपैयाँ मूल्यका गाडीमा बढी आकर्षण देखिएको छ। प्रवेशस्तरका गाडीप्रति बढेको चासोले नयाँ ग्राहकसमेत थपिएको उनको भनाइ छ।

नाइमा बोर्ड सदस्य निराकर श्रेष्ठले बुकिङ उत्साहजनक भए पनि कतिपय ग्राहकले एउटै समयमा दुई–तीनवटा मोडल बुक गरेकाले सबै बुकिङ बिक्रीमा परिणत नहुने बताए। उनका अनुसार कुल बुकिङमध्ये करिब ५० प्रतिशत मात्रै अन्तिम बिक्रीमा जाने अनुमान छ।

Originally published on abcnews.com.np.