धनगढी । सुदूरपश्चिम प्रदेशका मुख्यमन्त्री खगराज भट्टले सेती प्रादेशिक अस्पतालको सेवा सुधारका लागि हरेक १५ दिनमा अस्पतालको अनुगमन गर्ने बताउनुभएको छ।

आइतबार सामाजिक विकासमन्त्री सन्तोष शर्मा थापासहित अस्पताल पुग्नुभएका मुख्यमन्त्री भट्टले अस्पतालको अवस्थाबारे नियमित जानकारी लिने बताउनुभएको हो।

अनुगमनका क्रममा उहाँले आकस्मिक कक्षसँगै जोडिएको शौचालयलगायत अस्पतालका विभिन्न स्थानको निरीक्षण गर्नुभयो। अस्पतालको सरसफाइ तथा सेवा प्रवाहलाई चुस्तदुरुस्त राख्न उहाँले अस्पताल प्रशासनलाई निर्देशन दिनुभयो।

मुख्यमन्त्री भट्ट र सामाजिक विकासमन्त्री थापाले अस्पतालमा उपचाररत बिरामीसँग भेट गरी उनीहरूका समस्या तथा गुनासा समेत सुन्नुभयो। बिरामीहरूले उपचार सेवा, जनशक्ति र अस्पताल व्यवस्थापनसँग सम्बन्धित समस्या मुख्यमन्त्रीसमक्ष राखेका थिए।

सुदूरपश्चिममा सबैभन्दा बढी बिरामीको चाप रहने सेती प्रादेशिक अस्पतालमा जनशक्ति तथा भौतिक पूर्वाधारको अभावका कारण सेवा प्रवाह प्रभावित हुँदै आएको छ।

अस्पतालमा ५० शय्याको स्वीकृत दरबन्दी रहे पनि बिरामीको चापअनुसार सेवा दिन अस्पताल व्यवस्थापन समिति तथा विभिन्न कार्यक्रमअन्तर्गत चिकित्सक र स्वास्थ्यकर्मी नियुक्त गरेर सेवा सञ्चालन हुँदै आएको छ।

आवश्यक जनशक्ति र पूर्वाधार पर्याप्त नहुँदा उपचारका लागि आउने बिरामीले प्रभावकारी सेवा पाउन समस्या भोग्दै आएका छन्।

मुख्यमन्त्री भट्टले नियमित अनुगमन गर्ने घोषणा गरेसँगै अस्पतालको सेवा सुधार तथा व्यवस्थापनमा थप पहल हुने अपेक्षा गरिएको छ।

Originally published on abcnews.com.np.