काठमाडौं २४ पुस । संघीय संसद सचिवालयले राजनीतिक दलहरुलाई कुन पार्टी कुन बेञ्च (सत्तापक्ष वा प्रतिपक्ष) मा बस्ने भनेर सोधेकोमा नेका, माधव नेपाल, नागरिक उन्मुक्ति र लोसपाले प्रतिपक्ष बेन्चमा बस्ने बताएका छन् । सचिवालयले दलहरुले दिएको जवाफका आधारमा प्रतिनिधिसभा भवनमा सिट व्यवस्थापन गर्ने गरेको छ ।

संसद सचिवालयका अधिकारीहरुका अनुसार ‘नेपाली कांग्रेस र एकीकृत समाजवादी, नागरिक उन्मुmि पार्टी र लोसपलाले ले प्रतिपक्षी बेञ्चमा बस्ने जानकारी गराएको छ ।

प्रचण्ड सरकारलाई विश्वासको मत दिने कि नदिने भन्ने दोधारमा परेको एसका नेता माधव नेपालले नेकपा माओवादी केन्द्रका अध्यक्ष एवं प्रधानमन्त्री पुष्पकमल दाहाल ‘प्रचण्ड’सँग आइतबार बिहान भेटेका थिए । भेटपछि प्रधानमन्त्री प्रचण्डले आफूलाई विश्वासको मत दिने सन्दर्भमा एकीकृत समाजवादी सकारात्मक रहेको जवाफ दिएका थिए । तर, एकीकृत समाजवादीले संसद सचिवालयलाई भने आफूहरुलाई प्रतिपक्षी बेञ्चमा राखिदिन भनेको हो ।

प्रधानमन्त्री प्रचण्डले मंगलबार विश्वासको मत लिँदैछन् । यसकारण सोमबारबाट सुरु हुने अधिवेशनमा एकीकृत समाजवादीले आफूहरुलाई प्रतिपक्षी बेञ्चमा राखिदिन गरेको आग्रहलाई अर्थपूर्ण रुपमा लिइएको छ ।

नागरिक उन्मुक्ति पार्टीका अध्यक्ष रन्जिता श्रेष्ठले सरकारलाई विश्वासको मत दिने तर रेशम चौधरीको रिहाई नभएसम्म सरकारमा नजाने बताइन् । लोसपाले सरकारलाई विश्वासको मत दिने कि के गर्ने भन्ने जिम्मा अध्यक्ष महन्थ ठाकुरलाई दिएको छ । अझैसम्म संसदको सवैभन्दा ठूलो दल कांग्रेस समेत विश्वासको मत बारे अनिर्णित छ ।