काठमाडौँ । धादिङको गल्छी गाउँपालिका–६ का वडाध्यक्ष दीपककुमार कार्कीले सत्तारुढ राष्ट्रिय स्वतन्त्र पार्टीकी सांसद आशिका तामाङले राहत वितरणका विषयमा आफूहरूलाई ‘थर्काएको’ आरोप लगाएका छन्।

शनिबार बिहान वडा कार्यालयमा राहत वितरणसम्बन्धी बैठक भइरहेका बेला सांसद तामाङ आएपछि केहीबेर भनाभन भएको वडाध्यक्ष कार्कीले बताएका छन्।

वडाध्यक्ष कार्कीका अनुसार वडा कार्यालयले यसअघि नै प्रभावित परिवारलाई प्रतिपरिवार १० हजार रुपैयाँका दरले नगद राहत वितरण गरिसकेको थियो। त्यस्तै, चाउचाउ र बिस्कुटलगायत खाद्यान्नसमेत एक चरण वितरण गरिएको उनले बताए।

त्यही समयमा सांसद तामाङ वडा कार्यालयमा आएर राहत वितरण प्रभावकारी नभएको भन्दै प्रश्न गरेको कार्कीको भनाइ छ।

वडाध्यक्ष कार्कीका अनुसार तामाङले आफूहरूलाई ‘अहिलेसम्म के हेरेर बसेको’ र आफूले पठाएको राहत सामग्री किन वितरण नगरेको भन्दै प्रश्न गरेकी थिइन्।

तर सांसद तामाङले कुन सामग्री पठाएको र ती सामग्री कहाँ आइपुगे भन्नेबारे आफूहरूलाई जानकारी नभएको वडाध्यक्ष कार्कीले बताए।

सांसद तामाङले आफूहरूलाई ‘तिमीहरू’ भनेर सम्बोधन गर्दै थर्काएको भन्दै त्यसबाट आफूहरू असन्तुष्ट भएको कार्कीको भनाइ छ।

‘हामी रातदिन फिल्डमा खटिएका छौँ। सुत्न र आराम गर्न पाएका छैनौँ। साइरन बज्दा रातभर मानिसको उद्धारमा खटिनुपरेको छ। यस्तो अवस्थामा हामी निदाएर बसेजस्तो व्यवहार गरिँदा रिस उठ्यो,’ कार्कीले भने।

उनका अनुसार त्यसपछि आफूहरूले पनि सांसद तामाङलाई ‘थर्काउन आएको हो कि सहयोग गर्न?’ भन्दै प्रश्न गरेका थिए।

वडाध्यक्ष कार्कीले राहत तथा उद्धारको काममा जनप्रतिनिधिहरूबीच समन्वय आवश्यक रहेको बताए। फिल्डमा खटिएर काम गरिरहेका स्थानीय जनप्रतिनिधिलाई बाहिरबाट आएर दबाब दिनुभन्दा आवश्यक सहयोग र समन्वय गर्नुपर्ने उनको भनाइ छ।

‘हामी फिल्डमा छौँ। एउटा क्यामेरा तेर्साएर मात्र काम हुँदैन। काम त फिल्डमै गर्ने हो,’ कार्कीले भने।

राहत वितरण तथा उद्धारका क्रममा सांसद तामाङ र स्थानीय जनप्रतिनिधिबीच भएको भनाभनले विपत्तिको समयमा राहत व्यवस्थापन, समन्वय र राजनीतिक श्रेयको विषयलाई समेत बहसमा ल्याएको छ। यद्यपि, सांसद तामाङको तर्फबाट यस घटनाबारे थप प्रतिक्रिया भने यस विवरणमा समावेश छैन।

Originally published on abcnews.com.np.