काठमाडौं । सात दलीय सत्ता गठबन्धनले सातवटै प्रदेशमा मुख्यमन्त्री र सभामुखबारे भागबण्डा मिलाएको दावी गरेका छन् ।

आइतबार साँझ बालुवाटारमा बसेको सत्ता साझेदार दलका शीर्ष नेताहरूको बैठकले सातै प्रदेशमा कसले कुन पद पाउने भन्ने टुंगो लगाएको हो।

सहमति अनुसार माओवादीले बागमती प्रदेश र कर्णाली प्रदेशको मुख्यमन्त्री पाएको छ। बागमतीमा पहिलो कार्यकाल र कर्णालीमा ५ वर्ष माओवादीले सरकार चलाउने भएको हो।

‘बागमतीमा आलोपालो सरकारको नेतृत्व गर्ने सहमति भएछ, पहिलो कार्यकाल नेकपा माओवादी केन्द्र बागमती प्रदेश संसदीय दलका नेता शालिकराम जमरकट्टेल मुख्य मन्त्री हुनेछन् ।

स्रोतका अनुसार नेकपा एमालेले प्रदेश १, गण्डकी र लुम्बिनी गरी ३वटा प्रदेशको मुख्य मन्त्री पाउने भएको छ । प्रदेश १ मा आजै एमालेका हिक्मत कार्की मुख्यमन्त्री नियुक्त भइसकेका छन् ।

मधेश प्रदेशको मुख्यमन्त्री जनता समाजवादी पार्टी र जनमत पार्टीलाई आलोपालो दिने सहमति भएको छ।

बाग्मती र सुदूरपश्चिमको मुख्यमन्त्री माओवादी केन्द्र र एमालेले पालैपालो पाउने छन्। यो प्रदेशमा नागरिक उन्मुक्ति पार्टीको समेत दावी रहंदै आएको छ ।
संघीय राजधानी समेत रहेको वागमती प्रदेशमा राप्रपाले समेत मुख्यमन्त्रीको दावी गर्दै आएको थियो । ११० सदस्यीय बागमती प्रदेशमा सरकार गठन गर्न बहुमतका लागि कम्तीमा ५६ जना सांसद आवश्यक हुन्छ।

बागमती प्रदेशसभामा सबैभन्दा ठूलो दल कांग्रेसका ३७, एमालेका २७, माओवादी केन्द्रका २१, राप्रपाका १३, एकीकृत समाजवादीका ७, नेमकिपाका ३ र हाम्रो नेपाली पार्टीका २ जना सांसद छन्।