काठमाडौं २६ पुस । प्रधानमन्त्री पुष्पकमल दहाल प्रचण्डले संविधानको मर्म र भावनाअनुरुप नै अघि बढ्ने प्रतिवद्धता जनाएका छन् ।

विश्वासको मत लिने आफ्नो प्रस्तावमाथि दलहरुले उठाएको प्रश्नको जवाफ दिने क्रममा प्रधानमन्त्री प्रचण्डले सत्ता गठबन्धनका दलहरु न्यूनमत साझा कार्यक्रमअनुसार एक ठाउँमा आएको बताए ।
प्रचण्डले संसदबाट आफूलाई सबै दलले दिएको विश्वासको मतबाट गौरवान्वित भएको बताएका छन् ।

मंगलबार संसद बैठकमा सांसदहरुले उठाएको जिज्ञासाको जवाफ दिँदै प्रचण्डले न्यायोचित तरिकाले जिम्मेवारी पूरा गर्ने बताए।मलाई संसदमा रहेका लगभग सबैजसो दलको जुन समर्थन पाए,’ प्रचण्डले भने, ‘राष्ट्रिय जनमोर्चा र नेपाल मजदूर किसान पार्टीबाहेकका सबै सांसदहरुले दिनुभएको साथले गौरवान्वित भएको, राष्ट्रिय सहमतिको केन्द्रविन्दूमा भएको महसुस गरेको छु। अर्कोतिर कसरी जाने होला ? मैले न्याय गर्न सकुला नसकुला जस्तो लागेको छ।’

प्रतिनिधिसभा विघटन ठीक कि बेठिक भन्ने बहसतर्फ जान नचाहेको भन्दै उनले संविधानको कार्यान्वयन गर्ने आफूहरुको प्रतिवद्धता भएको बताए । उनले भने, ‘सदन विघटन सही थियो कि थिएन हाम्रो विषय होइन ।’

संविधान बनाउने क्रममा नै सदनलाई सर्वोपरी बनाउन सहमति भएको भन्दै उनले भने, ‘भोलि संविधान संशोधन गर्ने, नयाँ ठाउँमा पुर्याउने हुनसक्छ । संविधान संशोधन नहुँदासम्म त्यसको मर्म र भावनाअनुसार अघि बढ्न प्रतिवद्ध छौं ।’

संविधानको मर्म र भावना भन्दा दायाँबायाँ गर्ने छुट आफूलाई नभएको भन्दै प्रधानमन्त्री प्रचण्डले भने, ‘संविधानको रक्षा गर्ने प्रतिवद्धता व्यक्त गर्न चाहन्छु ।’