काठमाडैं १ फागुन । नेपालका् दुई दिने औपचारिक भ्रमणका लागि काठमाडौँ आइपुगेका भारतीय विदेशसचिव विनयमोहन क्वात्रा र नेपालका परराष्ट्र सचिव भरतराज पौडेलबीच भेटवार्ता भइरहेको छ ।

होटल याक एन्ड यतीमा क्वात्राले परराष्ट्र सचिव पौड्यालसँग द्विपक्षीय भेटवार्ता गरिरहेका हुन्।

भेटवार्तामा कनेक्टिभिटी, विद्युत् व्यापार, पर्यटन, कृषि, स्वास्थ्य र संस्कृतिलगायत द्विपक्षीय सहकार्यका आधा दर्जन विषयमा छलफल हुने परराष्ट्र मन्त्रालयले जनाएको छ।

परराष्ट्र सचिवसँगको वार्तामा नेपालले सीमा समस्याको कुरा पनि उठाउने भएको छ। भारतले नेपाली भूभाग कालापानी र लिम्पियाधुरा अतिक्रमण गरेको छ। नेपालले वार्ताका लागि आग्रह गरे पनि भारतले कुरै सुन्न चाहेको छैन। तीन वर्षअघि भारतले नेपाली भूमि कालापानी समेटेर राजनीतिक नक्सा बनाएपछि जवाफमा नेपालले पनि लिम्पियाधुरा समेटेर नक्सा बनायो। त्यसयता सीमा विवादबारे वार्ता गर्न नेपालले राखिरहेको प्रस्ताव भारतले अस्वीकार गरिरहेको छ।

क्वात्राले आजै दिउँसो २ बजे परराष्ट्रमन्त्री विमला राई पौडेलसँग शिष्टाचार भेट गर्नेछन्।

दिउँसो ३ बजे विदेश सचिव क्वात्राले प्रधानमन्त्री पुष्पकमल दाहाल प्रचण्डसँग शिष्टाचार भेट गर्ने कार्यक्रम रहेको छ ।
प्रधानमन्त्रीसंगको भेट पछि उनले बेलुकी ६ बजे राष्ट्रपति विद्यादेवी भण्डारीसँग भेटवार्ता गर्ने कार्यतालिका रहेको छ ।
भोलि सचिव क्वात्राले एमाले अध्यक्ष केपी शर्मा ओली, नेका सभापति शेरबहादुर देउवा, माधव नेपाल र मधेशवादी दलका नेताहरुलाई भेट्ने बताइएको छ ।