एजेन्सी, १० फागुन । युक्रेनमाथि हमला गरेको एक वर्ष पुग्न केही दिनअघि रूसी राष्ट्रपति भ्लादिमिर पुटिनले अमेरिकासँग बाँकी रहेको एउटा आणविक सन्धीमा रूसी सहभागी नहुने बताएका छन् । मंगलबार मस्कोमा रूसको संसद्लाई सम्बोधन गर्दै पुटिजले युक्रेन युद्ध पश्चिमाहरूले सुरू गरेको आरोप लगाए ।

सम्बोधनका क्रममा उनले अमेरिकासँग भएको स्ट्राटेजी आर्म्स रिडक्सन ट्रिटी निलम्बन भएको घोषणा गरेका हुन् । आणविक हतियारको नियन्त्रणका लागि वासिङ्टन र मस्कोबीच भएको यो सन्धी सन् २०२६ मा सकिँदै थियो ।

एक घन्टा ४५ मिनेट लामो सम्बोधनका क्रममा पुटिनले उत्तर एटलान्टिक सन्धी संगठन (नेटो)लाई रूसीको सीमासम्म विस्तार गरेर रूसलाई खत्तम पार्न खोजिएपछि युक्रेनमाथि आक्रमणको अवस्था बनेको बताए ।

गत वर्ष फेब्रुअरी २६ मा पुटिनले युक्रेनमाथि आक्रमण गर्न निर्देशन दिएका थिए । एव वर्षदेखि जारी युद्धमा दुवैतर्फका हजारौँ सैनिक मारिएका छन् । सुरूमा पुटिनले युक्रेनमाथिको विशेष कारबाही केही दिनमा सकिने बताएका थिए । एक वर्षसम्म लम्बिएको युद्ध अझै जारी राख्ने पुटिनले संकेत गरेका छन् ।

“रूसलाई पराजित गर्नु असम्भव छ,” पुटिनले भनेका छन् ।