काठमाडौँ, १६ फागुन । अर्जेन्टिनाका विश्वकप विजेता फुटबलर लियोनल मेस्सीले फिफाको सर्वश्रेष्ठ पुरूष खेलाडीको उपाधि जितेका छन् ।

पेरिस सेन्ट जर्मेनका फरवार्डसमेत रहेका मेस्सीले फ्रान्सेली फरवार्ड केलियन एमबाप्पे र करिम बेन्जेमालाई पछि पार्दै २०२२ को फिफा वर्ष उत्कृष्ट खेलाडीको उपाधि पाएका हुन् ।

३५ वर्षीय मेस्सीको कप्तानीमा अर्जेन्टिनाले कतार विश्वकपको उपाधि जितेको थियो । मेस्सीले २०२१–२२ मा क्लब र देशका लागि ४९ खेलमा २७ गोल गरेका थिए ।

दोस्रोपटक फिफा उत्कृष्ट वर्ष खेलाडी बनेका मेस्सीले यो आफ्ना लागि आश्चर्य लागेको र सम्मानित भएको महसुस भएको बताउँदै भने,“मेरा साथीहरूबिना म यहाँ हुने थिइनँ । म धेरै भाग्यशाली छु ।”

अर्जेन्टिनालाई तेस्रोपटक विश्वकपको उपाधि दिलाएका लियोनेल स्कालोनी वर्षको उत्कृष्ट पुरूष प्रशिक्षक घोषित भए । उनले पेप ग्वार्डिओला र कार्लो एन्सेलोटीलाई पछि पार्दै उपाधि जितेका हुन् ।

अर्जेन्टिना र एस्टन भिल्लाका एमिलियानो मार्टिनेज उत्कृष्ट पुरूष गोलकिपर बने ।

महिलातर्फ बार्सिलोनाकी एलेक्सिया पुटेलास वर्षको उत्कृष्ट महिला खेलाडी बनिन् । इंग्ल्यान्डकी प्रशिक्षक सारिना विगम्यान उत्कृष्ट प्रशिक्षक घोषित भइन् ।