काठमाडौं । बाढीप्रभावित रसुवामा उद्धार तथा राहत कार्यलाई तीव्र बनाउन तीन जिल्लाबाट सशस्त्र प्रहरी बल नेपालको थप टोली परिचालन गरिएको छ।

सशस्त्र प्रहरी प्रधान कार्यालयका अनुसार सशस्त्र प्रहरी बल नेपाल नं. १९ गुल्म नुवाकोट, यूएन शान्ति स्थापना तालिम शिक्षालय ककनीअन्तर्गतको धादिङ गुल्म, विपद् व्यवस्थापन बेस आदमघाट तथा नं. १७ गण चितवनबाट थप सुरक्षाकर्मीको टोली रसुवातर्फ प्रस्थान गरेको हो।

बुधबार बिहान आकस्मिक रूपमा आएको बाढीका कारण रसुवामा ठूलो जनधनको क्षति भएको प्रारम्भिक जानकारी प्राप्त भएको छ। उद्धार तथा खोजी कार्यका लागि नेपाल प्रहरी, सशस्त्र प्रहरी बललगायत सबै सुरक्षा निकाय परिचालन गरिएका छन्। घटनाको विस्तृत विवरण भने अझै प्राप्त हुन बाँकी रहेको छ।

सशस्त्र प्रहरीका अनुसार नेपाल एपीएफ अस्पतालमा एक सय शय्या तथा आवश्यक स्वास्थ्यकर्मीको टोली तयारी अवस्थामा राखिएको छ। त्यस्तै, सशस्त्र प्रहरी बल नेपाल दंगा नियन्त्रण रेजिमेन्ट कीर्तिपुरबाट तीन प्लाटुन सुरक्षाकर्मीलाई त्रिभुवन अन्तर्राष्ट्रिय विमानस्थलमा तयारी अवस्थामा राखिएको छ।

यसैगरी, सशस्त्र प्रहरी बल नेपाल नं. २० विपद् उद्धार उपत्यका गणबाट ४५ जनाको विशेष उद्धार टोली नुवाकोट पठाइएको छ।

बाढीबाट प्रभावित क्षेत्रमा उद्धार तथा राहत कार्य जारी रहेकाले रसुवाको पछिल्लो अवस्था र क्षतिको यथार्थ विवरण आउन बाँकी रहेको सशस्त्र प्रहरीले जनाएको छ।

Originally published on abcnews.com.np.