काठमाडौँ, २२ फागुन । इंग्लिस प्रिमियर लिग (इपिएल) मा लिभरपुलले म्यानचेस्टर युनाइटेडलाई ७–० गोलले पराजित गरेको छ ।

गएराति भएको खेलमा लिभरपुलका लागि कोडी गाक्पो, डार्बिन नुनेज र मोहम्मद सलाहले २–२ गोल तथा रोबर्टो फिर्मिन्होले एक गोल गरे ।

पहिलो हाफको ४३औँ मिनेटमा गाक्पोले गोल गर्दै लिभरपुललाई सुरूवाती अग्रता दिलाएका थिए । नुनेजले ४७औँ मिनेटमा टोलीको अग्रता दोब्बर बनाएको तीन मिनेटपछि गाक्पोले व्यक्तिगत दोस्रो गोल गर्दै लिभरपुललाई ३–० मा पुर्‍याए ।

६६औँ मिनेटमा मोहम्मद सलाहले गोल थप्दा नुनिजले ७५औँ मिनेटमा अर्को गोल गरे । ८३औँ मिनेटमा काउन्टर अट्याकमा बल बढाउँदै सलाहले व्यक्तिगत दोस्रो गोल गरे । यो गोलसँगै सलाह लिभरपुलको सर्वाधिक गोलकर्ता बनेका छन् । उनको गोल संख्या १२९ पुगेको छ । साथै उनी लिभरपुलबाट युनाइटेडविरूद्ध सर्वाधिक १२ गोल गर्ने पहिलो खेलाडीसमेत बनेका छन् ।

निर्धातिर समय सकिन २ मिनेट बाँकी रहँदा रोबर्टो फिर्मिन्होले गोल गर्दै लिभुरपुललाई सानदार जित दिलाए ।

यो जितपछि लिभरपुल शीर्ष पाँचमा उक्लिएको छ । उसको २५ खेलबाट ४२ अंक भएको छ । पराजित युनाइटेड २५ खेलमा ४९ अंकका साथ तेस्रो स्थानमा कायमै छ ।