काठमाडौँ, २८ फागुन । आइसिसी विश्वकप लिग–२ त्रिकोणात्मक एकदिवसीय सिरिजअन्तर्गत नेपाल र युएई भिड्दै छन् । टियु क्रिकेट मैदानमा नेपालका कप्तान रोहित पौडेलले टस जितेर पहिला ब्याटिङ गर्ने निर्णय लिएको छ ।

आजको खेल जित्दै नेपाल दुई खेल अघि नै एकदिवसीय मान्यता जोगाउने लक्ष्यमा छ । पहिलो खेलमा पपुवा न्युगिनीलाई पराजित गरेको नेपाल त्यही लय कायम राख्दै लगातार जित निकाल्ने लक्ष्यमा छ । युएई भने पपुवा न्युगिनीसँग पराजित भएको थियो ।

युएईलाई पराजित गरेमा नेपालको ३४ खेलबाट ३५ अंक हुने छ र अमेरिकालाई पछि पार्दै चौथो स्थानमा उक्लने छ ।

सात राष्ट्र सहमागी लिग–२ को शीर्ष पाँचमा रहने टिमले एकदिवसीय मान्यता जोगाउने प्रावधान छ । युएईका लागि पनि एकदिवसीय मान्यता जोगाउन नेपालविरूद्धको खेल जित्नै पर्ने दबाब छ ।

नेपालले लिग–२ मा अहिलेसम्म युएईसँग ४ खेल खेल्दा १ पटक मात्र पराजित गरेको छ ।

यस्तै, नेपालले लिग–२ को शीर्ष ३ मा रहेर सिधैँ विश्वकप छनोटमा स्थान बनाउन बाँकी ३ वटै खेल जित्नुपर्ने छ । त्यसैले पनि नेपालका लागि आजको खेल महत्वपूर्ण छ ।

सबै ३६ खेल खेलिसकेको स्कटल्यान्ड र ओमानले शीर्ष दुईमा रहँदै विश्वकप छनोटमा स्थान पक्का गरिसकेका छन् ।

नेपाल र युएईको खेलमा नामिबियाको नजर रहने छ । यदि नेपाल युएईसँग पराजित भएमा नामिबिया तेस्रो हुँदै विश्वकप छनोटमा पुग्ने छ । ३६ खेल खेलिसकेको नामिबियाको ३९ अंक छ ।

नेपाल ३३ खेलमा १६ मा जित र १५ मा हरसहित ३४ अंकका साथ पाँचौँ स्थानमा छ । अमेरिका ३६ खेलमा १६ जित र १७ हारसहित ३५ अंकका साथ चौथो स्थानमा छ ।

नेपालले यदि युएईलाई हराउँदा ३६ अंकका साथ चौथो स्थानमा उक्लिने छ । बाँकी दुवै खेलमा पराजित भए पनि नेपाल शीर्ष पाँचमा रहँदै सोझै एकदिवसीय मान्यता बचाउने छ । त्यसैले नेपालको लक्ष्य युएईलाई हराउँदै दुई खेल अगावै एकदिवसीय मान्यता पक्का गर्ने हुने छ ।

यता युएई ३३ खेलमा १४ मा जित र १६ मा हरसहित ३१ अंकका साथ छैटौँ स्थानमा छ । युएईलाई शीर्ष पाँचमा रहँदै एकदिवसीय मान्यता जोगाउन बाँकी तीनै खेल जित्नुपर्ने हुन्छ ।