काठमाडौँ, १० चैत । लुम्बिनी प्रदेशमा नेकपा (माओवादी केन्द्र)सहितका दलहरूले नेकपा (एमाले) नेतृत्वको सरकारलाई दिएको समर्थन फिर्ता लिने तयारी थालेका छन् ।
माओवादी केन्द्र, नागरिक उन्मुक्ति पार्टी, लोकतान्त्रिक समाजवादी पार्टी (लोसपा), जनता समाजवादी पार्टी (जसपा) नेपालले सरकारलाई दिएको समर्थन फिर्ता लिने आन्तरिक गृहकार्य थालेका हुन् ।
गत पुस २७ गते माअोवादी केन्द्रसहित नागरिक उन्मुक्ति पार्टी, लोसपा, जसपा, राष्ट्रिय प्रजातन्त्र पार्टी र स्वतन्त्र सांसदको समर्थनमा एमालेको नेतृत्वमा सरकार बनेको थियो । पाँच दल र स्वतन्त्र सांसदहरूको समर्थनमा लुम्बिनी प्रदेश सरकारको मुख्यमन्त्री लीला गिरिले माघ ५ गते विश्वासको मत लिएका थिए ।
सरकार गठनका लागि समर्थन दिएका दलहरूले समर्थन फिर्ता लिने तयारीसँगै लुम्बिनी प्रदेश सरकार अल्पमतमा पर्ने भएको छ । माओवादी केन्द्र लुम्बिनी प्रदेश अध्यक्ष सुदर्शन बरालका अनुसार लुम्बिनी प्रदेश सरकारबाट राप्रपाबाहेक सबै दलहरू बाहिरिने तयारीमा रहेको बताए । एमाले र राप्रपा बाहेका दलहरूबीच आन्तरिक छलफल समेत भइरहेको उनको भनाइ छ ।
लुम्बिनी प्रदेशका ८७ सांसदमध्ये सरकार गठनका लागि ४४ जनाको समर्थन आवश्यक पर्छ । मुख्यमन्त्री गिरिले एमाले २९, माओवादी ९, नागरिक उन्मुक्ति ४, राप्रपा ४, लोसपा ३, जसपा ३ र स्वतन्त्र सांसद ३ गरी ५५ जना सांसदको समर्थन पाएका थिए । अब मुख्यमन्त्री गिरिले एमाले र राप्रपाका गरी ३३ सांसदको मात्र साथ पाउने देखिन्छ ।
माओवादी केन्द्रले समर्थन फिर्ता लिन ढिलाइ गरेका कारण सरकार समर्थित दलहरूको तयारीले चाँडै पूर्णता पाउन नसकेको नागरिक उन्मुक्ति पार्टीका प्रमुख सचेतक राजकुमार चौधरीको भनाइ छ ।
प्रतिक्रिया दिनुहोस्