काठमाडौं २७ बैशाख । सिंहदरबारमा प्रधानमन्त्री पुष्पकमल दाहाल ‘प्रचण्ड’, नेपाली कांग्रेसका सभापति शेरबहादुर देउवा र नेकपा ९एमाले०का अध्यक्ष केपी शर्मा ओलीबीच भएको छलफल सकिएको छ।

प्रधानमन्त्री कार्यालयमा नेताहरूबीच झन्डै साढे एक घन्टा कुराकानी भएको हो।

आजको भेटमा संसदीय समितिहरूको नेतृत्व, सत्य निरूपण तथा मेलमिलाप विधेयकलगायत विषयमा छलफल भएको कांग्रेस संसदीय दलका प्रमुख सचेतक रमेश लेखकले जानकारी दिए। लेखक पनि बैठकमा सहभागी थिए।

‘आजको भेटघाटको मूल विषय भनेको संसदभित्रकै विषयको हो। बजेटको तयारी भइरहेको छ। नीति तथा कार्यक्रम संसदमा प्रस्तुत हुने कुरा छ, विनियोजन विधेयकका कुरा आज सकिन्छ। त्यसपछि संसदको काम अघि बढ्छ,’ लेखकले भने,‘यिनै केन्द्रित भयौं।’

भुटानी शरणार्थी प्रकरणमा पूर्वगृहमन्त्री बालकृष्ण खाणलगायत पक्राउ परेका बेला नेताहरूबीच भेटवार्ता भएको हो।

तर यस विषयमा आज छलफल नभएको लेखकले बताए।

केहीबेरमा बाहिरएका ओलीले पनि लेखकको कुरामा सही थापे।

‘रमेशजीले जे भन्नुभयो त्यही कुरा भएको हो,’ ओलीले भने।

पछिल्लो समय प्रधानमन्त्री प्रचण्ड, देउवा र ओलीले निरन्तर संवाद गरिरहेका छन्।