काठमाडौं १५ असार । जिल्ला अदालत ललितपुरमा कार्यरत नायब सुब्बा प्रेमिका तामाङमाथि अभद्र व्यवहार गर्ने कानुन व्यवसायीमाथि अवहेलनाको मुद्दा दायर भएको छ ।

शुक्रबार तामाङ पीडित तामाङ आफैँले ३६ वर्षीय कानुन व्यवसायी अमिर लामिछानेविरुद्ध मुद्दा दायर गरेकी हुन् ।

रिट निवेदनमा गत बुधबार अदालतको कार्यालयभित्रै लामिछानेले आफूमाथि हातपात गरेको दाबी गरिएको छ । निवेदनमा बुधबार अपराह्न साढे ४ बजेतिर लामिछानेले आफैँ अदालतका कागजातहरू पल्टाएर हेर्न थालेकोमा आफूले भिडभाड भएकाले अहिले नहेर्न भनेको तर उनले उल्टै दुर्व्यवहार गरेको उल्लेख छ ।

लामिछानाले हातपात गर्दा आफ्नो मुख र पाखुरामा चोट लागेको तथा सर्टसमेत च्यातिदिएको तामाङको दाबी छ । लामिछानेले कार्यालयको काम तथा न्याय सम्पादनमा अवरोध गरेको दाबी गरिएको छ ।

ूनिज विपक्षी प्रतिवादी वारेसले मिसिल तानी आफैँ कागजातहरू पल्टाई हेर्न थालेकोमा मिसिल नहेर्नुस्, कागजातहरू हराउँछ, अहिले भिडभाड छ तपाईंलाई आवश्यक भए नक्कल सारी हेर्नुहोला भनेकोमा निजले तँ धेरै जान्ने हुन्छेस, तँ को हो ? तलाईं देखाउँछु भन्दै तथानाम अपशब्द बोली मुख छाडी गालीगलौज गरी हातपात समेत गरेको,ू निवेदनमा भनिएको छ ।

लामिछानले अदालतको अवहेलना गरेकाले उनलाई न्याय प्रशासन ऐन, २०७३ को दफा १७(४) अनुसार हदैसम्मको सजाय तथा जरिबाना गर्न निवेदकको माग छ ।