काठमाडौं २१ असार । बिहीबार प्रधानमन्त्री निवास बालुवाटार बसेको गठबन्धनको बैठकले प्रमुख दुई विषयमा निर्णय गरेको छ।

बैठकले प्रधानमन्त्रीको राजीनामा मागी एमालेले असंसदीय अभ्यास भएको निष्कर्ष निकाली एक ढिक्का भएर बचाउमा उत्रिने निर्णय गरेको छ। एमालेले गरेको संसद् अवरुद्ध सुचारुका लागि आग्रह गर्दै गठबन्धनमा आवद्ध सातै दलले प्रधानमन्त्रीको पक्षमा संसद्‌मा आफ्नो धारणा राख्ने निर्णय गरेका छन्।

यसैगरी बैठकले सदनमा निष्क्रिय अवस्थामा रहेको मिटरब्याज समस्या समाधानका लागि बनेको विधेयक पनि अघि बढाउने निर्णय गरेको छ।

मुलुकी संहितासम्बन्धी केही ऐनलाई संशोधन गर्न ल्याइएको उक्त विधेयकलाई नियमित प्रक्रियाअनुसार अघि बढाउने र गठित छानबिन समिति पनि कायम राख्ने सहमति भएको माओवादी केन्द्रका महासचिव देव गुरुङले जानकारी दिए।

बैठकमा प्रधानमन्त्री प्रचण्ड, नेपाली कांग्रेसका सभापति शेरबहादुर देउवा, जसपा अध्यक्ष उपेन्द्र यादव, नेकपा एकीकृत समाजवादीका उपाध्यक्ष राजेन्द्र पाण्डे, नागरिक उन्मुक्ति पार्टीकी अध्यक्ष रञ्जिता चौधरी, लोसपा अध्यक्ष महन्थ ठाकुर, जनमतका अध्यक्ष सीके राउत लगायतका सहभागी थिए।