काठमाडौं २२ असार । नेपाल प्रहरीका प्रमुख प्रहरी महानिरीक्षक वसन्तबहादुर कुँवरले नेपाल प्रहरी समायोजनमा जान तयार रहेको बताएका छन् ।

नेपाल प्रहरीको कार्ययोजना २०८० तथा आफ्नो ३ महिने कार्य अवधिको उपलब्धि सार्वजनिक गर्न पत्रकार सम्मेलन गर्दै आईजीपी कुँवरले भने, ‘प्रहरी समायोजनको विषय ५ महिनाभित्र सक्ने गरी सरकारको नीति तथा कार्यक्रममा पनि आएकाले यो विषय प्रहरीको उच्च प्राथमिकतामा छ ।’

प्रहरी समायोजनमा जाँदा केन्द्रको शक्ति खुम्चिने भएकाले यसलाई अघि नबढाइएको आरोप प्रदेशका मन्त्रीहरुले लगाइरहेका छन् । शुक्रबारै गृहमन्त्री नारायणकाजी श्रेष्ठले पनि समायोजनको काम आफ्नै पालामा सक्ने बताएका छन् ।

तर, समायोजनमा जान प्रहरी नेतृत्व नै अनिच्छुक रहेको भन्दै प्रश्न उठेको थियो । त्यसक्रममा आईजीपी कुँवरले भने, ‘नेपाल प्रहरीले गर्ने भनेको राज्यको निर्देशनको कार्यान्वयन हो, प्रदेशबाट पनि यस विषयमा प्रेसर परेको छ । सम्भवतः यो काम तोकिएको समयमा पूरा हुन्छ भन्नेमा सचेत छौं ।’ त्यसका लागि प्रहरी प्रधान कार्यालयले आफ्नो तयारी समेत गरिरहेको उनले बताए ।

एक फरक प्रसंगमा आईजीपी कुँवरले अहिले संगठन सुधारका लागि उपयुक्त वातावरण रहेको बताए । ‘राजनीतिक नेतृत्वदेखि लिएर हरेक कुराले अहिले संगठन सुधारका लागि उपयुक्त समय छ’ उनले भने, ‘त्यसका लागि नेपाल प्रहरी कार्ययोजना, २०८० ल्याएर काम गरिरहेका छौं ।’