काठमाडौं, २२ माघ । प्रदेश नंं १ पनि आजै प्रदेशसभाको पहिलो बैठक बस्दैछ । बैठकको लागि सबै तयारी पूरा भएको छ । आज सोमबार हुने प्रदेश नं १ को पहिलो बैठकका लागि आइतबार जिल्ला समन्वय समितिको सभाकक्षमा पूर्व अभ्यास बैठक सञ्चालन गरिएको थियो ।

ज्येष्ठ सदस्य ओमप्रकाश सरावगीले सभा सञ्चालन गर्नुभएको बैठकमा प्रदेश प्रमुख गोविन्दबहादुर तुम्बाहाङबाट प्राप्त पत्र सुनाउँदै प्रदेशसभा सदस्यलाई स्वागत गर्नुभएको थियो।

उक्त अवसरमा ज्ञात अज्ञात शहीदको सम्झनामा एक मिनेट मौनधारण गरिएको थियो ।
उहाँले यही माघ २९ गते हुने प्रदेश सभामुख निर्वाचनका लागि आज सूचना जारी गर्न प्रदेश सचिवालयलाई आह्वान गर्दै आगामी माघ २९ गतेसम्मका लागि सदन स्थगित गरिएको जानकारी गराउनुभयो ।

पूर्वाभ्यास बैठकमा प्रदेशसभा सदस्य, विभिन्न राजनीतिक दलका प्रतिनिधि, प्रदेश सचिवालयका कर्मचारी, जिल्ला समन्वय समितिका कर्मचारी र सञ्चारकर्मीको सवैको सहभागिता रहेको थियो ।

प्रदेश नं १ को आज हुने पहिलो अधिवेशनको भव्य तयारी गरिएको छ । विराटनगरस्थित जिल्ला समन्वय समितिको सभा भवनमा दिउँसो १ बजेदेखि अधिवेशन सुरु हुनेछ । पहिलो अधिवेशन सञ्चालनका लागि तयारी पूरा भइसकेको संसद् सचिवालयका सहसचिव धु््रव घिमिरेले जानकारी दिनुभयो ।

प्रदेशसभा भवनको माथिल्लो भाग अर्थात रोस्टममा कार्पेट बिछ्याएर सभामुख, संसद् सचिव र कार्य व्यवस्थाको कुर्सी राखिएको छ ।
रोस्टमको मुनि भागमा निलो कार्पेट बिछ्याएर संसद् सदस्यको कुर्सी राखिएको छ । सभा भवनमा एकातर्फ सत्तापक्ष र अर्कोतर्फ प्रतिपक्षको कुर्सी राखिएको छ । त्यसको पछाडिको भागमा सञ्चारकर्मीको लागि कुर्सीको व्यवस्था गरिएको छ ।

सभा भवन साँघुरो भएकाले सञ्चारकर्मीलगायत आमन्त्रित व्यक्तिका लागि परिसरमै बस्ने व्यवस्था मिलाउन लागिएको प्रमुख जिल्ला अधिकारी रामप्रसाद आचार्यले बताउनुभयो । परिसरबाट टिभी वा प्रोजेक्टरमार्फत प्रत्यक्ष प्रसारण गर्ने व्यवस्था मिलाइएको समेत आचार्यले बताउनुभयो ।

संसद भवन भित्र १ सय ५० जना अट्न सक्ने गरीे ब्यवस्थापन गरिएको र ९३ जना संसद रहेकोमा आजको लागि भने केही विशिष्ठ व्यक्तिहरु पनि सभाहलमा राखिने गरी ब्यवस्थापन गरिएको छ । संसद भवन प्रवेशमा ५ किसिमको परिचय पत्र लागू गरिएको छ ।

बैठक संचालन गर्ने बारेमा सर्वदलीय नै निर्णय गरिसकेको छ । बैठकको शुरुवाती अवस्थामा नै प्रदेश प्रमुखबाट प्राप्त पत्र बढेर सुनाईने      छ । सभामुखको सहयोगको लागि बिभिन्न दलबाट ५ सदस्यीय अध्यक्ष मण्डल गठन गरिने, अधिवेशनमा शुभकामना मन्तब्य ७ जनाले राख्नेछन् ।
प्रदेशसभामा सहभागी दलहरुमध्येबाट ६ जना र १ जना स्वतन्त्र रहने संसद सचिवालयले जनाएको छ । वैठकले सभा संचालन सम्बन्धी अन्तरिम कार्यविधि पास गर्नेछ ।