काठमाडौं, १९ भदौ । त्रिभुवन अन्तर्राष्ट्रिय विमानस्थल हुँदै हङकङ पठाइएको लागुऔषध गाँजा र चरेस त्यहाँको एक्सरे मेसिनमा जाँच नै नगरी ‘पास’ गराइएको खुलेको छ ।

नेपाल एयरलाइन्सको विमानमार्फत गएको साउत २६ गते गाँजा र चरेस हङकङ पठाइएको थियो । विराट ग्लोबल प्राइभेट लिमिटेडमार्फत कार्गोबाट नेपालमा उत्पादित गाँजाचरेस हङकङ पुर्‍याइएको खुलेको हो ।

त्रिभुवन विमानस्थलबाट ‘पास’ भएको गाँजा र चरेस हङकङमा बरामद, छानबिनमा जुट्यो प्रहरी
उक्त गाँजा र चरेस हङकङ प्रहरीले बरामद गरेको थियो । नेपालबाहिर पठाइने कार्गोको सामग्री चेकिङमा विमानस्थलमा नेपाल प्रहरीको लागुऔषध नियन्त्रण ब्युरोको टोली खटिने गरेको छ ।

ब्युरोकै एक टोलीले सो प्रकरणबारे छानबिन गरिरहेको छ । एक्सरे जाँच नै नगरी गाँजाचरेस पास गराइएको छानबिन टोलीले पत्ता लगाएको छ । ब्युरोका प्रहरी नायब उपरीक्षक डीएसपी अनन्तराम शर्माको नेतृत्वमा छानबिन समिति बनाइएको छ ।

सोही समितिको प्रारम्भिक अनुसन्धानमा डिउटीमा खटिएका प्रहरी कर्मचारीकै लापरबाही वा ‘सेटिङ’मै गाँजाचरेस बाहिरिएको खुलेको हो । सीसीटीभी फुटेजमा जाँचपासबिनै कार्गोबाट सामग्री पठाइएको देखिएको छ । त्यो बेला डिउटीमा खटिएका ब्युरोका प्रहरीलाई विमानस्थलबाट फिर्ता गरेर कारबाहीको तयारी गरिएको छ ।

ब्युरो स्रोतका अनुसार त्यो बेला ‘चेकिङ’मा वरिष्ठ सई निरञ्जन पनेरुको नेतृत्वमा प्रहरी सहायक निरीक्षक कैलाश राउत र विष्णुबहादुर थापा खटिएका थिए । प्रहरी हवल्दार निरकुमारी राई र प्रदीप बस्नेत पनि सोही डिउटीमा थिए । उनीहरू सबैलाई ब्युरो कार्यालयमा फिर्ता बोलाएर छानबिन थालिएको छ ।

ब्युरोका प्रमुख एवं एसएसपी गोविन्द थपलियाले केही कमजोरीका कारण गाँजाचरेस बाहिरिएको देखिएको बताए । घटनाबारे थप अनुसन्धान भइरहेको उनको भनाइ छ ।

हङकङ प्रहरीले गाँजा र चरेस बरामदबारे नेपाल प्रहरीलाई साउन ३१ गते पत्राचार गरेर जानकारी गराएको थियो ।