काठमाडौं, ३० भदौ ।  प्रधानमन्त्री पुष्पकमल दाहाल ‘प्रचण्ड’ संयुक्त राष्ट्रसंघीय महासभामा सहभागी हुने अमेरिका प्रस्थान गरेका छन् ।शनिबार साँझ ६ बजे कतार एयरलाइन्सको उडानबाट प्रचण्ड न्युयोर्क उडेका हुन् । प्रचण्डलाई बिदाई गर्न उपप्रधान तथा रक्षामन्त्री पूर्णबहादुर खड्का, अर्का उपप्रधान र गृहमन्त्री नारायणकाजी श्रेष्ठ, मन्त्रीहरु, सभामुख देवराज घिमिरे, माओवादी केन्द्रका नेताहरु वर्षमान पुन, हरिबोल गजुरेल, पम्फा भुसाललगायत अन्तर्राष्ट्रिय विमानस्थल पुगेका थिए ।

प्रचण्डले ४ असोजमा ७८औं राष्ट्रसंघीय महासभालाई सम्बोधन गर्ने कार्यतालिका छ । परराष्ट्रमन्त्री एनपी साउद नेतृत्वको टोली भने यसअघि नै न्यूयोर्क पुगिसकेको छ । न्यूयोर्क रहँदा प्रधानमन्त्रीले विभिन्न मुलुकमा राष्ट्रप्रमुख तथा सरकार प्रमुखसँग साइडलाइन वार्ता गर्नेछन् । उनी अमेरिकी राष्ट्रपति जो वाइडेनले आयोजना गर्ने रात्रीभोजमा पनि सरिक हुनेछन् । प्रधानमन्त्री प्रचण्ड ५ असोजमा उतैबाट चीन भ्रमणमा जानेछन् ।