सिन्धुली, ७ कातिक । गोलन्जोर गाउपालिका ४ तिनकन्यास्थित ऐतबहादुर बलको घरमा अष्टमीका दिन आगजनी हुँदा लाखौ रुपयाँ धनमाल नष्ट भएको छ । दशैका लागि जोहो गरिएको खाद्यान्न, नयाँ लुगाफाटा र अन्नपात जलेर नष्ट भएको हो । अष्टमीका दिन पुरूषहरू सबै गाउँतिर भएको अवस्थामा आगलागी भएको थियो ।

आगलागीबाट घर पूर्ण रूपमा जलेको छ । दशैका बेला परेको यो विपत्तिमा वर्ल्ड भिजन नेपालसितको साझेदारीमा रिलिफ नेपाल सिन्धुलीले नवमीकै दिन राहत सहयोग गरेको छ । रिलिफ नेपालका उपाध्यक्ष डण्ड गुरूङले त्रिपाल, खाद्यान्न, लत्ताकपडा, भाडाकुडा लगायत सामग्री हस्तान्तरण गरे ।

वडा सदस्य ताराबहादुर खपाङ्गी, रिलिफ नेपालका अस्मिता थापा मगर, युवा समाजसेवी पारस गुरूङ, स्थानीय बासिन्दा चन्द्र खुलाल, ओम थापामगर, तप्तबहादुर गुरूङ लगायतको उपस्थितिमा सहयोग हस्तान्तरण गरिएको हो । सोही अवसरमा युवा समाजसेवी पारस गुरूङले तत्काल राहत पुगोस भन्दै नगद २ हजार रूपैयाँ पीडितलाई हस्तान्तरण गरे । रिलिफ नेपालका उपाध्यक्ष डण्ड गुरूङले पीडितको घर बनाउन जस्तापाताको जोहो मिलाउन पहल गरिने प्रतिवद्धता जनाए । उनले पीडितको आर्थिक अवस्था निकै कमजोर रहेकोले सहयोगका लागि सबैमा अनुरोध गरे ।