काठमाडौं, ९ पौष । नेपाल राष्ट्र बैंकका गभर्नर महाप्रसाद अधिकारीले नेपालमा डिजिटलाइजेसनको विकल्प नभएको बताएका छन् । आइतबार नेपाल क्लियरिङ हाउसको १५औं वार्षिकोत्सवमा गभर्नर अधिकारीले डिजिटलाइजेसनले समाजमा सुशासन ल्याउनदेखि नोटको प्रयोगबाट हुन सक्ने विकृति हटाउने बताए ।

डिजिटलाइजेसनले आर्थिक पारदर्शिता बढाउने र आर्थिक प्रणाली अझ बलियो बन्दै जाने उनको दाबी छ । नेपालमा डिजिटलाइजेसन प्रणालीको विस्तार बढिरहेको र अहिलेसम्मको प्रगतिबाट गौरव गर्नुपर्ने बताए ।

आम नागरिक पनि चाँडै डिजिटल पेमेन्टमा जानुपर्ने बताएका उनले फाइनान्सियल क्षेत्र परिवर्तनकारी क्षेत्र भएकाले यसलाई अझ बलियो बनाएर लैजानुपर्ने आवश्यकता रहेकोमा जोड दिए ।

गभर्नर अधिकारीले सबै सरोकारवाला संस्था र क्षेत्रहरू लाग्ने हो भने अरु मुलुकले झैँ समग्र अर्थतन्त्रलाई डिजिटलाइजेसन गर्न सकिने धारणा राखे ।