काठमाडौं १७ पौष । परराष्ट्र मन्त्रालयले परराष्ट्र मामिला अध्ययन प्रतिष्ठानको कार्यकारी निर्देशकको नियुक्ति प्रक्रिया अघि बढाएको छ । परराष्ट्रले मंगलबार सूचना प्रकाशित गर्दै प्रतिष्ठानको कार्यकारी प्रमुखका निम्ति आवेदन मागेको छ ।

परराष्ट्र मामिला अध्ययन प्रतिष्ठानको कार्यकारी निर्देशकको नियुक्तिका लागि गठित छनोट तथा सिफारिस समितिले पदपूर्तिको आवेदन मागेको हो । इच्छुक नेपाली नागरिकले सूचना प्रकाशित भएको १५ दिन अर्थात् आउँदो माघ २ गतेभित्र कार्यालय समयमा परराष्ट्र मन्त्रालयको सामान्य प्रशासन महाशाखामा आवेदन दिन सूचनामा अनुरोध गरिएको छ ।

आवेदन दिन चाहने व्यक्ति ६५ वर्ष उमेर ननाघेको हुनुपर्नेछ । यस्तै, आवेदन दिने व्यक्तिले मान्यता प्राप्त शिक्षण संस्थाबाट कम्तीमा स्नातकोत्तर उपाधि हासिल गरेको हुनुपर्ने सूचना उल्लेख छ ।

कार्यकारी निर्देशकका निम्ति आवश्यक अरू योग्यता र अनुभवमा अन्तर्राष्ट्रिय कानुन, कूटनीति र आर्थिक कूटनीतिक क्षेत्रमा कम्तीमा १० वर्ष काम गरेको हुनुपर्ने उल्लेख छ ।

नेपालको परराष्ट्र नीति तथा मामिलामा विशेष योगदान दिएको र उच्च व्यवस्थापकीय पदमा कम्तीमा पाँच वर्षको अनुभव भएको व्यक्तिले कार्यकारी निर्देशक पदमा आवेदन दिने सक्नेछन् ।