काठमाडौं ३० असार । अमेरिकाका राष्ट्रपति जो बाइडेनले गोली लागेर पनि पूर्वराष्ट्रपति डोनाल्ड ट्रम्प सुरक्षित रहेकामा सन्तोष व्यक्त गरेका छन्।

आगामी राष्ट्रपतीय निर्वाचनमा उम्मेदवार बन्ने तयारी गरिरहेका पूर्वराष्ट्रपति ट्रम्पलाई शनिबार राति पेन्सिलभेनियामा आयोजित चुनावी र्‍यालीका क्रममा गोली हानिएको हो।

गोली आफ्नो दाहिने कानको माथिल्लो भागमा लागेको ट्रम्पले बताएका छन्।

हाल उनी स्थानीय स्वास्थ्य केन्द्रमा उपचाररत रहेको र अवस्था सामान्य रहेको बीबीसीले जनाएको छ।

यसैबीच अमेरिकी राष्ट्रपति बाइडेनले उक्त घटनाको निन्दा गर्दै ट्रम्प सुरक्षित रहेको खबरले आफूलाई राहत मिलेको उल्लेख गरेका छन्।

बाइडेनले लेखेका छन्, ‘ट्रम्प सुरक्षित र स्वस्थ छन् भन्ने थाहा पाउँदा मलाई राहत मिलेको छ। अमेरिकामा यस्तो हिंसाको कुनै ठाउँ छैन। हामी राष्ट्रको रूपमा एकताबद्ध रहनुपर्छ। यो घटनाको हामीले निन्दा गर्नुपर्छ।’