काठमाडौ २० जेठ । सरकार र यातायात व्यवसायीबीच गएराति सहमति भए पनि सडकमा हिजोजस्तै सार्वजनिक गाडी कम चलेका छन् ।

साझा यातायात, मयुरलगायतका केही गाडी भने नियमित रुपमा चलिरहेका छन् । सबै सार्वजनिक गाडी नचल्दा यात्रुलाई सास्ती भएको छ । कोही पैदलै गन्तव्यतिर लागेका छन् भने कोही पठाओ, इनड्राइभ, याङ्गोलगायतका राइड शेयरिङ प्रयोग गर्न बाध्य छन् ।

सरकार र यातायात व्यवसायीबीच गएराति भएको छलफलमा निजी गाडीले पनि यात्रु बोक्न पाउनेगरी गण्डकी प्रदेश सरकारले ल्याएको नियमावली स्थगन गर्ने सहमति भएको छ ।

नियमावली स्थगन गर्न प्रधानमन्त्री कार्यालयले गण्डकी प्रदेश सरकारलाई पत्राचार गर्न तयार भएपछि यातायात व्यवसायीहरु आन्दोलनका कार्यक्रम फिर्ता लिन सहमत भएका छन् ।

नेपाल यातायात व्यवसायी राष्ट्रिय महासङ्घका अध्यक्ष विजयबहादुर स्वाँरले प्रधानमन्त्री कार्यालयले जति चाँडो गण्डकी प्रदेश सरकारलाई पत्राचार गरेर गण्डकी प्रदेश सरकारले नियमावली स्थगन गर्छ, त्यति चाँडो आफूहरुले आन्दोलनको कार्यक्रम फिर्ता लिने बताउनुभएको छ ।

आज कार्यालय खुलेपछि पत्राचारको काम हुने र यातायात बन्द फिर्ता हुन सक्ने भनिएको छ । तर कार्यालय १० बजेपछि मात्रै खुल्ने भएकाले अहिले सबै सार्वजनिक गाडी चल्न सकेका छैनन् ।

सरकारले ७ वर्षअघि सार्वजनिक यातायातमा सिन्डिकेट अन्त्यको घोषणा गरे पनि यातायात व्यवसायीले फेरि सिन्डिकेटलाई ब्युँत्याउने प्रयास गरेका हुन् ।

तत्कालीन केपी शर्मा ओली नेतृत्वकै सरकारले सार्वजनिक यातायातमा एकाधिकार तोड्न भन्दै २०७५ साल वैशाखमा सिन्डिकेट अन्त्यको घोषणा गरेको थियो । सडकमा थोरै गाडी चलेका छन् ।